Un di e aspectonan mas importante na e momento aki den desaroyo di nos comunidad ta e direccion cu nos economia lo tuma den e proximo 20 – 30 aña. Pa por evalua esey bon, nos mester bay den pasado reciente. Como un isla chikito den Caribe cu poco recurso natural, tur desaroyo economico mayor a depende di e uso di nos isla como un tipo di stacion intermedio den fluho economico internacional.
Despues di caba anteriormente den poco tempo cu recurso natural manera oro y fosfat, a scoge Aruba (y Corsou) como lugar faborable pa refineria di petroleo, na lugar di Venezuela mes como productor, pa motibo di falta di stabilidad politico aya. Cambio den maneho na nivel internacional den e negoshi di petroleo a haci cu desde añanan 60 di siglo pasa gradualmente e papel den petroleo a bira menos, te cu awor no a keda nada mas. Mirando e proceso ey biniendo pa nos, a cuminza cambia, den añanan 50 caba, pa otro actividad cu tambe ta depende enteramente di exterior, turismo. Esey te awe, y tambe den futuro a largo plazo, lo ta e actividad cu ta domina nos economia, como (casi) e unico cu ta trece e divisanan aden cu nos mester pa paga tur loke nos ta importa. Den esaki nos a bay den mesun direccion cu gran mayoria di pais den nos region, unda nan tambe a cambia pa turismo na momento cu nan actividadnan tradicional di exportacion, principalmente producto agricola, a cuminza bay atras. Nos ta parti di un region cu mas y mas ta depende di turismo, unda tur ta competi cu otro den esey, algo pa no lubida.
Diversifica economia?
Banda di e dominio di turismo pa varios decada semper tabatin intento pa yega na otro actividad economico cu lo por a amplia nos base economico, primordialmente actividad cu ta gana divisa via exportacion. Entre nan tabatin e empresa estatal di zona franca, Aruba Freezone NV. Otro tabata e refineria te na 2012, tempo cu el a cera definitivamente. A presenta cambio di energia a base di combustible fosil (petroleo, gas natural) pa energia renovable, pero esey no ta crea actividad economico nobo cu ta gana divisa, sino un cambio (positivo) di un forma di energia pa otro. Hopi otro iniciativa no a logra, y actualmente tin algun posibilidad chikito cu lo por yega na un contribucion minimo na nos Producto Interno Bruto (PIB; GDP) y na nos entrada na divisa. Pa duna un impresion di e contribucion modesto ey: Na 2023 nos a exporta un total di Afl. 5.770 miyon na producto y servicio. Gran parti tabata servicio – turistico – y solamente Afl. 199 miyon (3,4%) tabata producto exporta, di cual Afl. 125 miyon (2,1%) tabata via Freezone. Den e parti di servicio tin un suma modesto di divisa cu a drenta via servicio na exterior no-turistico; di esey nos no tin dato concreto. E informacion aki ta importante ora partido politico ta presenta plan di actividad economico, cu por amplia eventualmente nos base economico, pa por tin un idea di nan impacto modera den nos realidad economico.
Diversifica turismo?
Un opcion pa contempla ta diversificacion dentro di turismo. Esaki bao di e condicion estricto di no sigui aumenta e actual asalto riba cierto recurso fragil, manera naturaleza, riba tera ni riba/den lama. Por pensa riba turismo medico, a base di servicio medico di calidad halto, cu por fortifica nos propio base di servicio medico local. Otro tema por ta turismo relaciona cu deporte acuatico (yachting) y biahe di luho maritimo, eventualmente den un contexto regional, den conexion cu otro isla y pais cercano.
Sustitui importacion?
Nos no por keda sin trata separadamente e tema di sustitui importacion via produccion local. Ta trata aki semper di cierto ‘niche market’ cu por prospera a base di condicion faborable specifico. Por ehemplo, tin actualmente atrobe interes pa produci webo di galiña, cu a resulta factible den pasado bao di condicion special; no ta conoci cu actualmente ta cumpli cu e condicionnan ey. Otro caso ta producto agricola specifico, manera cierto fruta y berdura, cu bon rendimento y cu por produci sin ocupa demasiado espacio. Nos no ta mira ainda un maneho gubernamental cu ta duna guia den kico si y kico no ta subsidia, dependiendo di perspectiva di rentabilidad. Aspecto importante pa tuma na cuenta ta e tema di proteccion via aumento di impuesto di importacion riba competencia exterior, esaki segun experiencia propio no ta funciona bon y preferiblemente no ta ni considera.
Desaroyo sostenible ta factible?
Por ultimo, e perspectiva di desaroyo stabil y sostenible, algo cu no ta di moda so, sino ta guia di desaroyo socio-economico pa mas di 50 aña caba na nivel academico. Pa nos e tarea dificil ta pa percura pa un pilar economico unico manera turismo, ta sostenible. Si no tin un turismo sostenible, no tin nada sostenible. E menazanan mayor pa sostenibilidad turistico actualmente no ta bin di exterior, sino ta fruto di decision strategico mal tuma localmente, principalmente di crecemento di acomodacion turistico fuera di loke nos ta capaz di maneha, sigur mirando nos recursonan natural y humano. E sensatez den maneho gubernamental cu nos no a mira den ultimo decadanan lo no aparece awor sin mas. Tema importante anto pa campaña.
