Ministerio di Salud di El Salvador ayera diaranson a anuncia cu lo suspende e lesnan na scol pa loke ta resta di aña 2020, pa via di e pandemia di coronavirus nobo.
“Como gobierno nos a scucha e pedido di mayornan y famia, nan a pidi nos pa no pone salud di nan yiunan den riesgo, p’esey nos a dicidi di mantene e suspension di les presencial, na nivel nacional, te 31 di december”, e titular di Ministerio di Salud, Carla Hananía de Varela a bisa den un conferencia di prensa.
E funcionario a señala cu e decision a wordo tuma den coordinacion cu Ministerio di Salud y cu “ta aplica pa tur centro educativo publico y priva, cu calendario nacional y internacional, di sector educativo formal y no formal di tur modalidad”.
El a indica cu den e lunanan cu ta keda pa termina e aña escolar, e maestronan cu ta traha na institucionnan publico mester garantisa cu e alumnonan, desde esunnan mas chikito te esunnan mas grandi, lo continua siña bao di e modalidad virtual.
Ademas e institucionnan educativo priva, cu calendario internacional “lo mester mantene e labor di acompañamento tutorial via nan plataforma virtual, durante e prome cuatro luna di aña escolar 2020-2021” Varela a señala.
Tambe e funcionario a bisa cu universidadnan lo sigui cu ciclo II di 2020 di manera no presencial y nan ta keda cu e facultad di desaroya actividadnan academico presencial cu ta indispensabel pa e carera cu protocolnan di bioseguridad estableci.
9 di augustus ultimo, durante un intervencion na radio y TV di presidente Nayib Bukele, e minister a indica cu 47 maestro a fayece di Covid-19 y cu 5.000 maestro, di total di 43.000 di e sistema educativo, ta mayor di 60 aña, “loke ta aumenta e riesgo di contagio”.
Te diamars ultimo, e total di contagio na El Salvador tabata di 23.717, di cual 11.696 tabata activo, 633 persona a fayece y 11.388 Salvadoreño a recupera.
