(EFE) – Presidente di El Salvador Nayib Bukele, a sigura riba su rednan social diadomingo ultimo den oranan di anochi cu “control” di teritorionan, cu pa añanan tabata domina pa gangnan “Mara Salvatrucha (MS13), Barrios 18 y otronan mas chikito, awor nan ta totalmente bao control di Estado.”

El Salvador for di final di maart ta bao un regimen di excepcion, cu a cumpli 8 luna di vigencia unda a wordo suspendi derechonan constitucional, despues di un ola di asesinato cu a kita e bida di 80 persona den tres dia.

Den e contexto aki, diasabra ultimo den oranan di marduga por lo menos 10.000 funcionario di siguridad a sali riba caya na ciudad di Soyapango, e di tres localidad cu mas poblacion di El Salvador cu tabata califica como un di e mas peligroso na e pais pa presencia di gangnan.

E ciudad, ubica na 12 kilometer di San Salvador e capital, a wordo “cera” como un strategia, segun autoridadnan di siguridad, pa “saca” e gangnan cu te ayera no a wordo captura y e “guera contra gangnan” ta continua.

Di acuerdo cu Bukele, “den menos di 48 ora, mas di 140 gangnan a wordo aresta den area cera aki”.

“Municipio di Soyapango, esun cu mas poblacion na nos pais, ta totalmente cera for di diasabra ultimo den oranan di marduga, Control Teritorial ta totalmente di Estado awor”, e mandatario a publica.

Minister di Defensa, Rene Merino Monroy, diasabra ultimo a hustifica e implementacion di e ceramento aki y a sigura cu “no lo afecta e poblacion honra” y cu “ta respeta e derechonan humano”.

“No tin ningun persona honra cu a wordo afecta pa e ceramento cu nan a wordo estableci. E operacion ta dirigi directamente contra gangnan cu ainda ta scondi y esey no ta genera inconveniencia den e poblacion honra, ta totalmente falso cu e operacion aki lo genera molestia” Merino Monroy a señala.

Soyapango califica como un di e mas peligroso na e pais pa presencia halto di gangnan, tin un poblacion di aproximadamente 258.921 habitante.

Bao medida di estado di excepcion a wordo captura, segun autoridadnan Salvadoreño, mas di 58.000 gangnan y personanan vincula cu e gruponan aki.