(AFP) – Partido oficialista di El Salvador ayera diadomingo a celebra eleccionnan interno den cual tin solamente e pre-candidatura di e presidente di e pais, Nayib Bukele, un tramite legal cu ta busca su reeleccion na 2024 memey di un debate tocante si Constitucion ta prohibi of no un segundo mandato consecutivo.
Forsa conservador Nuevas Ideas (NI) a habri su proceso di votacion cu a tuma luga di manera online. “Ta ora di vota” e partido a skirbi riba Twitter. “Ban realisa e proceso mas democratico y transparente,” a bisa riba Facebook.
Ley ta obliga e partidonan cu ta pretende participa den eleccionnan di 2024 pa efectua eleccion interno y defini nan candidato. Debi na falta di contrincantenan, Bukele ta e candidato di NI y ta bay ta acompaña di su formula presidencial, e actual vice-presidente di e Republica, Felix Ulloa.
Bukele di 41 aña, na september di 2022 a anuncia su decision di busca e reeleccion despues cu Corte Supremo di Husticia a emiti un resolucion cu ta habilita reeleccion presidencial, un sentencia cu causa un polemica riba si e medida ta legal of no.
Constitucion Salvadoreño ta señala cu no por presenta na eleccion presidencial, “esnan cu anteriormente a fungi como Presidente di Republica pa mas di seis luna, consecutivo of no, durante e proceso anterior of den ultimo seis luna anterior na comienso di periodo presidencial.”
Encuestanan ta duna Bukele como vencedor, ken tin un guera contra gangnan y p’esey a haya un aprobacion di mas di 90% di e poblacion a pesar cu e medida aki a haya critica di organisacionnan di derechonan humano.
