(AFP) – Presidente recien reeligi, Nayib Bukele, ken tambe ta controla Congreso, a gana e ultimo etapa di poder ora a haya 43 di 44 conseho municipal, den eleccion celebra diadomingo ultimo cu un participacion baho di votadonan.

Den eleccion, e partido oficialista Nuevas Ideas y “partidonan cu ta apoya nos proyecto, 43 di 44,” segun Bukele a sigura riba e red social X.

Manera a sucede den eleccion general di 4 di februari, Bukele a atribui na su mes e victoria prome cu Tribunal Supremo Electoral (TSE) a pronuncia tocante e resultadonan.

TSE a cuminsa presenta datonan preliminar diadomingo den oranan di anochi, Nuevas Ideas ta bay goberna den e mayoria di 14 departamento, incluyendo e capital San Salvador na unda e alcalde Mario Duran di 40 aña, a ser reeligi.

“Danki na pueblo Salvadoreño pa continua dunando mi e oportunidad di sirbi boso. Nos ta acepta e victoria aki cu humildad.” Duran a bisa riba X.

“Eleccion a desaroya den normalidad, sin dificultadnan, den ambiente di paz,” e presidente di TSE, Dora Esmeralda Martinez a bisa momentonan prome di ciere di votacion.

6.2 miyon votado a ser convoca e biaha aki, pero e eleccion aki a ser considera como un “tramite” despues di e invencibel triunfo di Bukele den eleccion general den cual su partido Nuevas Ideas ademas a gana 54 di 60 stoel di Congreso.

Segun Bukele, “e pueblo ta sabio” y algun di e alcaldenan nobo ta pertenece na partidonan cu semper tabata t’ey pa apoya “tur cambio” cu e pais tabatin mester, for di prome cu el a gana e presidencia na 2019.

Un ora prome cu e ciere Bukele a bay vota cu su casa Gabriela Rodriguez na un par di urna instala na avenida Olimpico, na San Salvador, na unda e personanan presente tabata grita “Biba Nayib.”

Cu 90% di stoelnan di Congreso gana, Bukele ta conta cu e votonan suficiente pa aproba sin problema cualkier proyecto di ley, eligi magistradonan di Corte Supremo y fiscal general, ademas di mantene e regimen di excepcion cu e cual ta combati gangnan for di dos aña caba.

Beneficia pa su lucha contra gangnan, Bukele a ser reeligi cu 84,65% di e votonan segun e verificacion oficial.

Su popularidad halto ta e resultado di lucha contra criminalidad, cu ta acumula mas cu 75.000 persona deteni y a duna e paz back na e cayanan di e pais.

E resultadonan di diadomingo ultimo “ta caba di confirma e concentracion di poder” di Bukele, lo cual “ta implica un debilidad mayor di oposicion” di iskierda y derecha, segun director di investigacion di opinion publico di Universidad Francisco Gavidia, Oscar Picardo ta premira.