(AP) — Congreso Salvadoreño a vota pa elimina inmunidad legislativo di un politico acusa di a haci un acuerdo cu e gangnan poderoso di e pais, ya cu esaki tabata preveni su enhuiciamento.
Sesentiseis di e 84 legislador di Asamblea Legislativo a vota pa sostene e solicitud di Procurador General pa habri Norman Quijano pa huicio. Diesdos legislador di su partido conservador a bandona e sala durante e votacion.
Quijano a keda eligi e aña aki pa sirbi un termino di cinco aña den parlamento Centro Americano. Prome cu esey, el a sirbi como legislador federal y alcalde di San Salvador. Quijano a bandona El Salvador tiki prome cu fin di su termino legislativo anteriormente e aña aki prome cu su eleccion den e cuerpo regional.
Na november, Procurador General, Rodolfo Delgado a pidi e Asamblea Legislativo pa retira inmunidad di Quijano pa asina por enhuici’e pa supuesto fraude electoral y asociacion ilicito.
E acusacionnan ta bin di campaña presidencial na 2014, den cual Quijano tabata e candidato di partido conservador Aliansa Republicano Nacional. Fiscal ta bisa cu e ex-alcalde di San Salvador a paga e gangnan poderoso di e pais pa sostene su campaña presidencial. Quijano a perde contra Salvador Sanchez Ceren di partido iskierdista di Farabundo Marti, Frente di Liberacion Nacional.
Oficina di Procurador General anteriormente a solicita pa elimina inmunidad di Quijano na 2020, pero e Asamblea Legislativo e tempo ey a rechasa e solicitud.
Siman pasa, Tesoro Mericano a acusa oficialnan di e administracion actual di presidente Nayib Bukele di participa den negociacionnan secreto cu e gangnan. Gobierno Mericano a alega cu nan a cumpra cooperacion di e gangnan pa reduci tasa di homicidio na e pais y a busca nan sosten den eleccionnan legislativo e aña aki.
Bukele a rechasa fuertemente e acusacionnan.
