Fundacion Gabo, periodista- y artistanan Ibero Americano, entre nan Ruben Blades y Diego Luna, diamars ultimo a pidi Comision Interamericano di Derechonan Humano (CIDH) un “urgente actuacion” pa e “atake” di e presidente Nayib Bukele di El Salvador contra e corant digital El Faro.
Den un carta dirigi pa relator special pa Libertad di Expresion di CIDH, Edison Lanza, e firmantenan a solicita e organismo internacional pa “monitoria di manera special y cu urgencia extremo e situacion na El Salvador lo mas lihe posibel”.
Igualmente a insisti pa e organisacion “expresa pronto di manera publico su opinion califica riba e hechonan grave aki señala, den e luz di standard interamericano di libertad di expresion”, asina como “anuncia publica- y formalmente cu e relator lo mira detenidamente e condicionnan di prensa na El Salvador”.
E carta a wordo respalda pa periodistanan di Argentina, Bolivia, Brasil, Chile, Colombia, Costa Rica, Cuba, Ecuador, El Salvador, Spaña, EEUU, Guatemala, Honduras, Mexico, Nicaragua, Panama, Peru, Paraguay, Portugal, Puerto Rico, Republica Dominicana, Uruguay y Venezuela.
E presidente Salvadoreño siman pasa durante un intervencion na radio y television a bisa cu Ministerio di Hacienda supuestamente ta investiga El Faro pa “labamento di placa”.
Dia despues, El Faro a publica cu “Hacienda na e momentonan aki ta examina e contabilidad di e corant aki di e añanan 2014, 2016, 2017 y 2018”, pero no a notifica na su representantenan di e investigacion aki.
Bukele tambe a acusa otro medionan Salvadoreño di gaña y ataca su Gobierno, entre nan corantnan como La Prensa Grafica, El Diario de Hoy y El Mundo, y e website Factum y El Gato Encerrado.
Pa cu esaki, e firmantenan a señala cu “ta hopi grave” cu Bukele “ta utilisa un cadena nacional pa anuncia un investigacion contra un medio di prensa, cu te ainda e investigacionnan no a termina y ni Ministerio di Hacienda ni Fiscalia a notifica e corant di algun iregularidad ni na su contabilidad ni di existencia di un investigacion pa e delitonan aki”.
