(AFP) – Tras su reeleccion pa otro cinco aña mas na februari ultimo, e guera anti gangnan di Bukele a adopta un politica conservador, aunke, prome cu el a yega na poder e tabata bisa cu e tabata apoya e reivindicacion di comunidad LGBTI.

Siman pasa, Bukele a anuncia e retiro di 300 empleado di Ministerio di Cultura “pa promove agendanan no compatibel” cu vision di su gobierno, loke varios funcionario a celebra como un “defensa pa famia tradicional,” “fe y bida.”

Dos dia prome, Ministerio di Cultura a aproba e presentacion di un obra LGBTI na Teatro Nacional, cu despues a ser cancela di manera inespera despues di su prome funcion.

E piesa teatral tabata un produccion di colectivo queer Proyecto Inari y tabata conta violkencia y rechaso familiar y institucional sufri pa personanan di comunidad gay. Den e tipo di espectaculo aki, artistanan drag masculino ta bisti y make up manera hendenan muhe.

Exclui historicamente, poblacion LGBTI na El Salvador ta enfrentando un riesgo mayor cu lo por viola ainda mas e derechonan di nan debi na declaracionnan di Bukele, interpreta como un discurso di odio contra e comunidad aki.

LGBT ta keda “den situacion di vulnerabilidad” ora hende ta scucha e presidente definiendo nan como “antinatural, antidios, antifamia,” segun un pastoor gay a sigura.

Poco despues di gana eleccion, na februari ultimo Bukele a asisti igual cu su homologo Javier Milei di Argentina, na e mayor convencion di coservadornan na Merca, unda a aplaudi ex-presidente Donald Trump.

E mesun luna ey, Ministerio di Educacion a anuncia cu a retira di e bukinan escolar “tur señal” di perspectiva di genero, decision aplaudi pa gruponan conservador y critica pa activistanan di derechonan humano.

Bukele ta drentando “den e club chikito di politiconan di ultra derecha mega reaccionario,” antropologo Juan Martinez a bisa.

Tambe na februari ultimo, Ministerio di Salud a elimina un protocol cu e cual personanan di diversidad sexual tabata ricibi atencion “liber di stigma y discriminacion” den un programa di prevencion di HIV,” segun Colectivo Alejandria LGBTIQ+ a señala.

Segun Organisacion Hende Muhe Salvadoreño pa Paz, na El Salvador “8 di cada 10 persona LGBTIQ+ ta sufri “discriminacion pa motibo di nan orientacion sexual” of identidad di genero.

“Gobierno y parti di sociedad kier nenga nos existencia y p’esey nos tin cu lanta nos voz, exigi y lucha pa nos derechonan,” Grecia Villalobos, activista a sigura.