Manera e dicho mes ta bisa, tabata asina cayente pafo durante fin di siman cu si a kibra un webo riba acera, esaki lo a hasa. Asina calor tabata haci durante fin di siman. Tur esaki, manera cu medionan internacional mes ta indica, cu ta trata aki di e fenomeno di El Niño, cu a zorg pa Aruba tambe sufri e consecuencianan.
Tin entendi cu varios hende a haya nan mes na porta di poli pa motibo di e calor inmenso, mas probabel di presion halto, cu ta un parti di e efecto di e calor.
Segun pronostico di Departamento Meteorologico, tur e dianan aki cuminsando desde awe te cu diasabra, e rayonan UV ta den su punto extremo y temperatura por escala rond di 34 grado Celsius, cual tin cu bisa, ta basta cayente.
Esaki ta condicionnan hopi caluroso, cual ta pasa no solamente na Aruba, sino riba e demas islanan di Antias Menor, esta Corsou y Boneiro, sin conta e otro islanan den e mesun region cu nos, manera Los Roques y tambe isla di Margarita.
Segun cu por a haya pronostico durante fin di siman for di Servicio Meteorologico di Venezuela, manera ya indica, ta keda rond di 34 grado, pero tin un sensacion di 40 grado Celsius. Tambe tin condicionnan hopi bochornoso, ya cu biento a disminui di manera significativo. Por spera e mesun condicionnan den e proximo dianan. E condicionnan hopi seco den e region y riba tera y shelo ta hopi solea, ta conduci cu e condicionnan aki ta hopi calido
Sigura bo mes pa bo keda hidrata y busca areanan ventila, por ehempel un bon fan of areanan cu airco. Tambe sigura pa mascotanan wordo con cuida, esta duna nan suficiente awa fresco y sombra.
Con calor ta afecta nos salud
Den e dianan di calor intenso aki, ta obliga e curpa humano na un esfuerso di adaptacion pa mantene e temperatura na e temperatura corporal normal: bo ta soda mas, e adernan ta dilata.
E esfuerso aki ta mayor:
Durante un prome ola di calor: e curpa ainda no a custumbra na e temperatura halto. Ora cu e calor continua durante varios dia o si e dia y e anochinan ta cayente.
Ora tin hopi humedad y no tin biento.
Kico nos por haci pa proteha nos salud. E problemanan di salud asocia na e temperatura halto por evita cu medidanan hopi simpel:
Bebe hopi awa of likido sin spera na tin sed, cu excepcion si tin contra indicacion medico. Evita bebidanan alcoholico, koffie, te of refresco.
De e dianan di calor intenso, permanece den luganan fresco, den sombra y si ta posibel pasa por lo menos dos ora den algun luga cu airco. Tuma un douche of un baño fresco.
Cera e cortinanan pa evita cu e solo drenta directamente. No habri e bentananan ora cu e temperatura exterior ta mas halto. Evita pa uza mashin y aparatonan cu por produci calor durante e oranan mas caluroso.
Haci cumindanan lihe cu ta yuda bo recupera mineralnan perdi pa e sodo (salada, fruta, berdura of juice). Evita actividadnan den exterior durante e oranan mas calor, en particular si e actividadnan ta intenso. Si tin cu permanece pafo, percura pa bo ta den sombra, uza paña lihe y di color cla, proteha bo mes di solo, uza un sombre of pechi.
Uza un sapato of sandalia fresco, comodo y cu ta transpira.
Personanan mayor, enfermo y muchanan tin mas problema.
E calor no ta afecta tur persona igualmente, algun tin mas riesgo: Personanan mayor, principalmente esunnan cu ta biba nan so of ta dependiente. Personanan cu tin enfermedad cardiovascular, cerebro vascular, respiracion, renal, neurologico, diabetes of bao di remedi (anticolinergico, antihistaminico, fenotiazina, anfetamina, psicofarmaco, diuretico, betablokeador).
Personanan cu facultadnan mental disminui. Muchanan menos di 4 aña. Personanan cu demasiado peso. Si ta un hende hopi grandi, cu ta bebe remedi of ta sufri di un
enfermedad cronico, consulta cu bo dokter riba e medidanan adicional cu tin cu adopta. Sigui bebe bo remedinan.
Yuda hendenan mas fragil rond di bo
Personanan mayor cu ta biba nan so, personanan cu facultadnan mental disminui of incapaz di adopta medidanan protector sin ayudo:
Tin cu wordo bishita of controla por lo menos un biaha pa dia (miho dos) pa un miembro di famia, amigo, bisiña of pa servicionan di salud of di thuiszorg (Wit Gele Kruis por ehempel).
Muchanan di 0 pa 4 aña. Sigura pa nan bebe hopi likido, bistinan cu paña cla y lihe y no laga nan nunca nan o den auto den solo of cu bentananan cera.
Personanan cu ta realisa trabaonan intenso, den exterior of actividadnan deportivo intenso tin cu reduci nan actividad den e oranan di maximo calor, proteha bo mes di solo y bebe bebidanan abundante cu ta recupera e likido y e mineralnan perdi pa e sodo (awa, juice, fruta, bebidanan deportivo).
Ki problemanan e calor por produci y con nos tin cu actua?
E calor por produci desde iritacionnan na cuero y calamber te na aumento di temperatura, tal, cu incluso por hiba nos na morto si nos no ricibi e atencion medico urgente.
Nos organismo ta componi di 60% di awa. E perdida di awa y mineral na a e sodo, si e no wordo recupera, ta produci sintomanan manera dolor di cabes, mareo, debilidad muscular of calamber, nausea y sacamento y incluso subimento di e temperatura corporal.
Golpi di calor
Problema grave: e curpa ta incapaz di controla e temperatura, cu ta bay subiendo rapidamente y por alcansa 40.6 grado Celsius. E sintomanan principal: calor, secura, y cuero cora, pulso lihe, dolor intenso di cabes, confusion y perdida di consciencia.
Kico tin cu haci?
Yama ambulance: Mientras cu ta warda, fria e curpa, percura pa ta den un luga scur,
pone paña di awa friu riba e curpa of dal un baño friu. Sin ayudo medico urgente, un golpi di calor por ta fatal. Kemaduranan di solo por wordo produci pa solo directo riba e cuero aunke e dia no ta mucho caluroso. Tin cu evita, pa ta den menos tempo exponi na solo y uza cremanan di proteccion.
