Abogado publico di Joaquín “El Chapo” Guzman, un di e mayor narcotraficantenan di mundo, a pidi anulacion di e proceso di “El Chapo”, na New York, pa motibo cu su huicio ta viola e tratado di extradicion entre Mexico y Merca.

Defensor di El Chapo a bisa den un solicitud, cu nan a presenta diahuebs ultimo dilanti di Corte Federal di Brooklyn, caminda ta relata cu extradicion di El Chapo ta ilegal y cu extradicion tabata posibel pa hopi afirmacion falso y declaracion den cual a gaña y a omiti varios detaye.

Abogadonan Michelle Gelernt y Michael Schneider a sigura cu mester cancela e proceso, pasobra Mexico no a haya sa y nunca a acepta e condicion di aislamento cruel y inhumano cu Chapo ta bibando aden desde cu el a yega New York.

Mexico a dicidi extradita “El Chapo”, di 60 aña, pa Merca despues di dos huida cu el a protagonisa for di un prizon na Mexico na aña 2015, via un tunnel di 1.5 kilometer di largura y 10 meter di profundidad, cu a ser excava te na baño den su cel den prizon.

Abogadonan ta recorda declaracion cu Mexico a acepta extradita “El Chapo” pa Texas of pa California, dos estado di tur siete distrito caminda e ex-hefe di cartel di Sinaloa tin varios demanda hudicial contra dje.

Pero dia 19 di januari Mexico a cambia di opinion y a pone El Chapo den un avion cu destino pa New York, caminda e ta deteni desde e luna ey y e ta warda su huicio cu lo cuminsa dia 16 di april 2018.

Guzman ta acusa di dirigi un imperio di narcotrafico na Merca, y acusa di manda mas di 200 ton di cocaina pa Merca. El Chapo tin 17 acusacion riba dje pero e ta sigura cu e ta inocente. E acusacion di ta dirigente di cartel di Sinaloa por resulta den un condena di sinta bida largo den prizon.

Abogadonan ta cuestiona cu gobierno di Mexico no a duna un dispensacion pa un regla cu ta den e tratado di extradicion, caminda ta estableci cu e acusado lo por ser husga, solamente pa acusacion specifico cu ta e causa di su proceso di extradicion.

Abogadonan ta rechasa e boluntad di fiscalia di confisca 14.000 miyon dollar di Chapo Guzman. E placa aki ta ekivalente na e cantidad di placa cu cartel di Sinaloa a haya como ganashi durante varios aña.

Te awe e abogadonan no sa kico a pasa cu e fortuna di ‘El Chapo’. E fiscal general di Mexico a sigura cu Merca no a haya ni un dollar di e placa di Guzman, pasobra supuestamente e no tabata usa e sistema financiero pa su negoshi criminal.