20 december 2018 Asamblea General di Nacionan Uni a adopta resolucion 73/250 proclamando Dia Mundial di Siguridad pa Consumo di Cuminda (World Food Safety Day) y entrante 2019, 7 di juni lo celebra beneficionan di alimento cu ta conta cu norma di higiena, sanidad y siguridad den nan produccion y preparacion.
Dia Mundial di Seguridad pa Consumo di Cuminda ta sirbi pa:
haci hende consciente di tema cu ta concerni higiena, sanidad y siguridad den produccion y preparacion di cuminda demostra con pa preveni maleza aplicando medida pa garantisa un produccion y preparacion higienico, sano y sigur di cuminda discuti enfoke colaborativo pa mehora higiena, sanidad y siguridad den produccion y preparacion di cuminda den tur sector concerni promove solucion y forma pa haci cuminda mas sigur pa consumo
Tema pa 2023: Standard pa seguridad di consumo di cuminda ta salba bida
Standard ta provee guia pa maneha alimento den un forma higienico pa agricultor y procesador di alimento. Nan ta defini nivel maximo di aditivo, contaminante permiti den alimento, residuo di pesticida y medicacion veterinario usa pa cria di bestia, cu por ser consumi pa un y tur.
Ademas, standard ta specifica con pa midi, pisa, paketa y transporta alimento den un forma sigur.
Y aplicacion di standard ta permiti pone label pa duna informacion nutricional y posibel contenido alergenico pa consumidor saca afor si e alimento ta sigur pa nan consumo.
Mayoria gobierno y organisacion a adopta y ta enforza standard pa alimento basa riba asesoria cientifico di riesgo, cubriendo riesgo di caracter biologico, chimico y fisico. Standard por ser desaroya pa gobierno of organizacion individual of pa organismo regional of intergubernamental pa standarisacion. Un tal organismo pa standarisacion di calidad y seguridad pa consumo di cuminda ta e Codex Alimentarius Commission, of simplemente Codex.
Codex ta e organismo den cual representante di 188 pais miembro y un organisacion miembro (Union Europeo) ta traha hunto pa asegura seguridad pa consumo di cuminda. Na 2023, e di 60 aniversario di Codex, nos ta celebra standard pa consumo di cuminda pa defini e trayecto pa seguridad pa consumo di cuminda pa un y tur y tur caminda.
Fuera di Codex Alimentarius ta existi e Standard ISO 22000 pa Food Safety Management. E organisacion Global Food Safety Initiative (GFSI) ta aproba y reconoce programa pa maneho di seguridad pa consumo di cuminda basa riba GFSI Benchmarking Requirements, cu ta deriva di e Codex Alimentarius.. Algun programa aproba ta FSSC 22000 (basa riba ISO 22000). BRC y IFS. HACCP, usa na Aruba, pa hotel y restaurant, ta un programa di seguridad pa consumo di cuminda.
Impacto di cambio climatico riba seguridad pa consumo di cuminda
Cambio climatico tin multiple impacto riba e seguridad pa consumo di cuminda, directo y indirecto, y ta menaza salubridad publico. Cambio den patronchi di awacero, tempo, aumento di temperatura averahe annual y evento di tempo extremo lo afecta den forma no uniforme diferente region productor di alimento, cu impacto negativo riba seguridad alimentario mas tanto den paisnan den desaroyo y tambe nutricion.
Dos factor principal, temperatura y humedad ta causa entre otro:
Modificacion di e contaminacion di awa y cuminda pa patogeno bacterial y viral, cual ultimo ta cambia den nan forma di sobrebibi y transmision. Cambio den incidencia y crecemento di fungi (schimmel) y formacion di micotoxina. Micotoxina ta ser produci pa cierto fungi riba cultivo manera trigo, maishi, aros y por causa efecto toxico agudo y malesa cronico (incluso cancer) den tanto ser humano como animal di cria.
Expansion di algal blooms den lago y oceano, interactuando cu nutriente di origen agricola of awa (no purifica) di riool, afectando ecosistema y especie marino pa consumo humano. Un riesgo halto di zoonosis (malesa transmiti di animal pa ser humano) emergente, cambio den sobrebibencia di patogeno y alteracion di malesa transmiti via vector (p.e. Sangura) y parasito den animal, lo cual por necesita un aumento di medicacion veterinario, cu posibel aumento di nivel residual den producto di origen animal.
Esaki no solamente ta presenta posibel riesgo agudo y cronico pa salud humano, pero tambe ta ser relaciona cu un aumento den resistencia contra medicamento antimicrobial pa patogeno den ser humano y animal.
un posibel aumento di uso di pesticida y consecuentemente nivel residual den producto agricola ora sistema di agricultura ser adapta na e creciente problema di plaga y especie invasor cu ta menaza cultivo, causa dor di cambio climatico.
Den e articulo Climate Change and Emerging Food Safety Issues: A Review (Duchienne-Moutien et alii, Journal of Food Protection, Vol.84, No.11, 2021, pp. 1884-1897) ta describi cu subida di temperatura ta aumenta (1) presencia di parasito den pisca y planta di awa dushi, (2) fungi afectando maishi y trigo, (3) salmonella den galiña, (4) bacteria di genera Vibrio den mariscos (un ta “flesh eating bacterium”). Aumento den humedad y awacero por aumenta contaminacion di lechuga, alfalfa, celeri, ciboyin cu E.Coli y Salmonella y via aerosol contaminacion di tomati cu Salmonella.
E problema mayor ta fungi y micotoxina, generalmente di genera Aspergillus, Fusarium, Penicillum y Alternaria. Fungi micotoxigenico ta afecta maishi, aros, nuez, koffie, cereales, fruta seca, specerij, cultivo pa cria di bestia, fruta y berdura.
Union Europeo mediante e programa CLEFSA (Climate Change as a driver for Food Safety) di e European Food Safety Authority a saca un rapport titula “Climate change as a driver of emerging risks for food and feed safety, plant, animal health and nutritional quality” riba e problema di cambio climatico riba e seguridad pa consumo di cuminda.
Food and Agriculture Organization (FAO) den e rapport “Climate Change: Unpacking the burden on food safety” a documenta e problema pa por establece un programa di accion.
Situacion na Aruba
Sector di servicio di cuminda (restaurant, takeaway, snacktruck, catering, servicio di entrega) y tur persona, empresa encarga cu produccion y preparacion di cuminda mester aplica regla stipula pa ley, cu ta ser controla, pero pa benta di cuminda den supermercado seguridad pa consumo di cuminda no ta regla pa cuminda daña of fecha di expiracion pasa.
Y no tin claridad pa producto agricola local bendi den supermercado, con pa confirma cumplimento cu standard necesario. E International Standards for Phytosanitary Measures hunto cu e Codex Alimentarius di Food and Agriculture Organization pa seguridad pa consumo di cuminda y e standardnan pa salud di animal di World Organization for Animal Health ta forma e tres pilar pa sector primario (agricultura, cria y pesca) pa combati maleza y plaga y percura pa seguridad pa consumo di cuminda.
Gobierno mester adopta un maneho combinando seguridad alimentario, salud di planta y seguridad pa consumo di cuminda pa sigura calidad, seguridad y disponibilidad di alimento nutritivo na Aruba.
