Reconociendo e singularidad, longevidad y versatilidad di e bicicleta, cu ya ta conta cu dos siglo di uso, y cu alabes ta constitui un medio di transporte sostenibel, simpel, economico, confiabel, limpi y ecologico cu ta contribui na un mihor medio ambiente y mehoracion di salud, e Asamblea General di Nacionnan Uni na 2018 a dicidi di declara 3 di juni como Dia Mundial di Bicicleta.

E dia aki ta encurasha stakeholders y personanan interesa pa enfatisa y avansa e uso di bicicleta como un medio pa promove desaroyo sostenibel, reenforsa educacion, incluyendo educacion fisico pa mucha y hoben, promove salud, preveni maleza, promove tolerancia, entendimento y respet mutuo, facilitando inclusion social y un cultura di paz.

E Asamblea General di Nacionnan Uni ta balora positivamente e organisacion di marcha di bicicleta pa fortalece salud fisico, mental y bienestar y desaroya asina un cultura di bicicleta den sociedad.

Pakico celebra e uso di bicicleta?

Actividad fisico di un intensidad modera, manera canamento, ciclismo of practica di deporte tin beneficio grandi pa salud. Na tur edad e beneficionan di ser activo fisicamente ta mas grandi cu e posibel daño causa por ehempel dor di accidente. Realisa cualkier actividad fisico ta mihor cu haci nada. Dor di bira mas activo durante e dia den forma relativamente simpel, hende lo por logra e nivelnan di actividad fisico recomenda facilmente.

Segun Organisacion Mundial di Salud (OMS/WHO), dor di ofrece un infrastructura sigur pa actividadnan fisico, manera canamento y core bicicleta, ta e caminda pa alcansa un mayor equidad den materia di salud. Pa e sectornan urbano mas pober, na unda no por permiti economicamente tin un vehiculo propio, bay na pia of core bicicleta por converti den un forma di transporte, y na e mesun momento por reduci e riesgo di contrae maleza cardiovascular, accidente cerebrovascular, cierto tipo di cancer, diabetes y hasta morto.

Consecuentemente, transporte activo mehora (cana, uso di bicicleta y transporte publico) no solamente ta saludabel, e tambe ta equitativo y ta mas efectivo pa loke ta gastonan di transporte.

Satisface e necesidadnan di ciclista y peaton ta sigui ta, por lo tanto, crucial pa soluciona problemanan di mobilidad di ciudadnan, pa mitiga e aumento di emision di gasnan cu ta causa e efecto invernadero debi na crecemento di e poblacion y pa mehora e calidad di aire y seguridad di trafico.

Ciclismo y Desaroyo Sostenibel

Dia Mundial di Bicicleta ta pone atencion riba e beneficionan di usa bicicleta, un medio di transporte simpel, economico, limpi y ambientalmente sostenibel. E bicicleta ta contribui na un aire mas limpi y menos congestion den trafico y ta haci educacion, cuido di salud y otro servicionan social bira mas accesibel pa e partinan mas vulnerabel den e poblacion.

Un sistema di transporte sostenibel cu ta promove crecemento economico, ta reduci desigualdadnan y ta reenforsa e lucha contra cambio climatico y ta fundamental pa alcansa e Obhetivonan di Desaroyo Sostenibel (SDGs).

SDGs y actividad fisico

Segun e Global Action Plan on Physical Activity 2018-2030 di OMS/WHO actividadnan fisico tin beneficionan multiplicador pa salud, economia y sociedad y inverti den accionnan di maneho politico pa aumenta actividad fisico por contribui na logra cumpli cu e Obhetivonan di Desaroyo Sostenibel (SDGs).

Tin multiple manera directo y indirecto, mediante cual maneho cu ta promove actividad fisico a traves di canamento, ciclismo, deporte, recreacion activo y hungamento por sostene no menos cu 13 di e SDGs.

Situacion di infrastructura pa bicicleta na Aruba

Aki na Aruba nos por constata cu e maneho politico no a duna prioridad na e infrastructura pa actividad fisico. Pa loke ta deporte mes e situacion ta conoci.

Pero ta e infrastructura pa peaton, ciclista y recreo activo den aire liber y espacionan publico no a haya atencion debido y nos infrastructura di transporte y mobilidad ta completamente dirigi riba facilita vehiculonan motorisa.

Ademas peaton y ciclista diariamente ta confronta inseguridad den trafico.

Pa compronde pakico e situacion ta asina nos tin cu bay back den historia.

Mas o menos trinta aña pasa Armand Hessels y algun otro persona tabata trahando intensivamente riba e proyecto ‘Fietspaden in Aruba’. Pa e meta aki a lanta Fundacion Arubano Caminda pa Bicicleta na 1998. DOW e tempo ey a colabora pa e diseño tecnico di e infrastructura.

Y hasta a logra haya compromiso pa sosten financiero pa e proyecto.

Sinembargo e proyecto a ser cancela pa dos rason clave. Ora a acerca Gobierno Hulandes pa financiamento a haya tende cu e proyecto ta relativamente barata pa realisa y Gobierno di Aruba ta dispone di suficiente recurso pa realisa e proyecto. Si Hulanda financia e proyecto, Aruba su Gobierno lo sigui malgasta placa publico den un mal maneho financiero.

Den e mesun periodo Sr. Hessels a hiba combersacion cu un funcionario halto di Gobierno.

Ora e funcionario a puntra pa e status quo di e realisacion di e proyecto, y Sr. Hessels a indica kico tabata e momento ey e situacion pa loke ta financiamento y aspectonan tecnico e funcionario a puntra si a “tene cuenta cu placa pa e Ministro cu tin cu firma”

Riba e pregunta di Hessels kico tabata kiermen cu esaki, e contesta tabata ta cu sin placa riba mesa pa e Ministro, lo no pone firma pa e proyecto por inicia y haya financiamento di Gobierno.

Ora Hessels a duna di conoce cu lo no paga Ministro pa e enrikece su mes y cu tal proyecto ta di interes general cu beneficio pa comunidad e respuesta di e funcionario tabata ta cu pa e Ministro interes general no tabata e principal rason pa pone su firma.

Y di e momento ey a nace e lucha di Armand Hessels pa combati corupcion.

Y hasta den intentonan hopi aña despues pa crea un infrastructura pa canamento, ciclismo y actividad fisico y recreo den e Longest Linear Park, corupcion a hunga un papel estelar.

E infrastructura pa deporte, canamento, ciclismo y recreacion activo aki na Aruba aparentemente ta un negoshi lucrativo, mediante cual politiconan y den sector priva y hasta sociedad civil personanan sin escrupulo ta mira numeroso oportunidad pa enrikece nan mes.

Y asina ta hustamente perhudica partinan mas vulnerabel den e poblacion kitando of strobando oportunidadnan pa yega na tur e beneficionan di salud, economia y sociedad manera indica pa Nacionnan Uni y PAHO/WHO.