Abeha y otro polinisador manera barbulet, raton di anochi, blenchi y hopi otro especie di animal y insecto ta ser menasa pa actividadnan di ser humano. Polinisacion ta un proceso fundamental den e sobrevivencia di ecosistemanan. Casi 90% di tur mata cu ta floria ta depende completamente of grandemente riba polinisacion animal, y mas cu 75% di e cultivonan agricola y 35% di e areanan di agricultura global.

Abehanan ta bou menasa. E tasa di extincion pa especienan ta 100 pa 1,000 biaha mas halto cu normal y ta causa pa impactonan humano. Cerca di 35% di polinisador invertebrado, particularmente abeha y barbulet, y como 17% di polinisador vertebrado manera raton di anochi, ta enfrentando extincion mundialmente.

Si e tendencia aki continua, cultivo nutritivo manera fruta, nues, y hopi verdura lo (mester) ser substitui pa cultivo basico manera batata, aros y maishi resultando den un dieta hopi desbalansa.

Nacionan Uni a designa 20 mei como Dia Mundial di Abeha mediante resolucion A/RES/72/211 na 2017.

Mediante celebracion di Dia Mundial di Abeha cada aña nos ta eleva e conscientisacion pa e papel cu abeha y otro polinisador ta hunga den mantene ser humano y nos planeta Tera saludabel, y alabes riba e cantidad di reto cu e abehanan ta encontra y enfrenta awendia, hopi di nan na man di ser humano mes.

E tema pa 2024: compromiso di hubentud cu abeha

Reconociendo e papel esencial cu hubentud por hunga den e lucha contra problemanan cu abeha y otro polinisador ta enfrentando, Dia Mundial di Abeha 2024 ta enfoca riba e tema “Compromiso di Hubentud cu Abeha” (Bee engaged with Youth). E tema ta destaca e importancia pa envolvi hende hoben den apicultura y esfuersonan pa proteha polinisadornan, reconociendo nan como e futuro guardianan di nos medio ambiente.

E campaña e aña aki tin como fin pa conscientisa hubentud y otro stakeholder tocante e papel esencial di abeha y otro polinisador den agricultura, balans ecologico y conservacion di biodiversidad.

Involucrando hende hoben den apicultura, iniciativa educativo, y esfuerso di promocion, nos por logra inspira un generacion nobo di lider ambiental y empodera nan pa tin un influencia positivo den mundo.

Promove y crea sistemanan agricola mas diverso y reduci dependencia riba kimiconan toxico por facilita un aumento di polinisacion E enfoke aki por mehora cantidad y calidad di alimento cultiva, beneficiando tanto ser humano como ecosistemanan.

Dia mundial di abeha 2023: e situacion na Aruba

E presentacion “A closer look at Aruba’s agricultural soil quality and the relationships between local farmers and Santa Rosa” na Universidad di Aruba den e simposio den cuadro di e programa entre Universidad di Aruba y University College Utrecht a indica cu agricultornan na Aruba ta usa relativamente poco pesticida y mas tanto ta usa practica di agricultura organico.

Pero na Aruba e uso di pesticida, fungicida, herbicida y miticida (ES: acaricida, pa mata pispis) ta un practica comun tanto den uso residencial como comercial den hardin y landscaping.

Greenpeace USA y Greenpeace International den nan campaña internacional “Save the Bees” a produci varios rapport y a conduci investigacion riba pesticida. Biologonan a encontra mas di 150 diferente residuo kimico den polen di abeha, un cocktail fatal segun e investigador y apicultor Eric Mussen di University of California.

E European Food Safety Authority (EFSA) a produci un rapport cientifico identificando tres pesticida cu un uso hopi amplio, esta e compuestonan neonicotinoida conoci como clotianidina, imidacloprid y tiametoxam cu ta presenta riesgo severo pa abeha.

Un rapport cientifico produci pa Greenpeace, titula “Bees in Decline” ademas di e tres compuesto ta identifica cuater pesticida mas peligroso pa abeha, esta clorpirifos, cipermetrina, deltametrina y fipronil.

Na Merca e uso di neonicotinoida ta ser indica pa US Department of Agriculture como peligroso ya cu por causa collapse di colonia di abeha, pero Environmental Protection Agency ta sigui permiti nan uso y e “Monsanto Protection Act” di 2014 ta otorga compania biokimico inmunidad contra casonan den corte pa daño causa na ser humano y e medio ambiente.

E Pesticide Action Network Europe (PAN Europe) ta aplaudi e reciente “EU Guidance Document on the risk assessment of pesticides on bees”, indicando cu por fin Union Europeo ta implementando un maneho mas efectivo pa proteha abeha contra uso di pesticida peligroso.

Pero na mesun momento agencianan di Union Europeo ta indica cu proteccion di polinisador ta fayando. E rapport di European Court of Auditors di 2020 titula “Special Report-Protection of wild pollinators in the EU-Commission initiatives have not borne fruit” ta indica incumplimento cu medida adopta.

Y cu algun siman mas restando prome cu eleccion pa Parlamento Europeo mas di 146 organisacion Europeo incluyendo e agencia Europeo European Environmental Bureau a saca un carta abierto pa urgi cu e agenda berde di Union Europeo acorda den pasado no ser debilita, ya cu den e ultimo dos aña un cantidad di pais Europeo a cuminsa debilita nan compromiso cu e “European Green Deal” den tanto conservacion di biodiversidad, proteccion ambiental, regulacion di kimico toxico y suavisa metanan pa accion climatico.

Y ta premira cu e coalicion di Gobierno Hulandes di PVV, BBB, VVD y NSC lo basicamente debilita e agenda berde di Hulanda considerablemente locual lo tambe influencia e agenda berde pa Reino Hulandes completo y consecuentemente pa Aruba tambe.

Kico tur esaki ta nifica pa Aruba?

Nos hubentud, alumno y studiante por haci hopi pa cera un compromiso cu abeha y polinisador:

• siña e papel di abeha y polinisador y e menasanan cu nan ta enfrentando;

• cera conoci cu e balor pa nutricion di honing produci pa abeha, den su forma natural, y no “adultera” cu ta cualkier honing na cual a agrega melasa, glucosa, sucu refina, high fructose corn syrup of otro producto similar y awa. Honing ta contene amino acido y nutriente esencial, sucu natural, mineral esencial, vitaminanan B compleho, C, D y E. Ademas honing ta duna energia y yuda cu curacion (p.e. den forma di te cu lamoenchi y honing) y den un forma di mescla di 50% honing y 50% hydrogen peroxide por yuda sana herida habri di diabetes y kemadura.

• planta un variedad di mata nativo, cu ta floria durante diferente periodo di aña;

• cera conoci cu apicultura y cumpra honing fresco di agricultor local;

• stimula famia, bario y comunidad pa planta matanan cu abeha por frecuenta y polinisa;

• crea proyecto escolar of di open science pa acumula y comparti data tocante abeha pa eleva conscientisacion den comunidad, rednan social, y como contribucion pa maneho di agricultura;

• stimula pa evita uso di pesticida, fungicida, herbicida y miticida den nos cura y hardin;

• proteha colonia di abeha salvahe na unda e ta posibel;

• sponsor un cas di abeha cerca un agricultor of apicultor;;

• crea un peticion pa gobierno regula uso di kimico, pesticida, herbicida, fungicida y miticida cu ta toxico pa abeha y polinisador y pa salud di ser humano y otro animal.

Cuminsa e biahe fascinante aki bishitando e website nobo di Union Europeo https://pollinatorhub.eu, crea como un portal pa tur informacion tocante agricultura, polinisador y temanan asocia pa tur gremio relevante, manera agricultor, consumidor, cientifico y tur otro interesadonan den e temanan concerni.

Pa medionan di prensa en general
 Pa mas informacion, tuma contacto via telefon na 7478280 of via email press.rwicore@gmail.com.