E ministro di Defensa Colombiano, Luis Carlos Villegas, a bisa cu si no ta prolonga e cese al fuego bilateral cu e guerrilla di Ehercito di Liberacion Nacional (ELN), vigente te dia 9 di januari proximo, e Forsanan Arma lo ta cla pa “enfrenta nan cu tur contundencia.”
“Si no tin proroga di e cese al fuego aki, cu e mehoracionnan cu a sugeri, nos ta cla pa respeta esaki, pero si no (…) e forsa publico lo ta cla pa enfrenta nan cu tur contundencia,” asina e hefe di e cartera di defensa a declara, cu a presidi diamars un conseho di siguridad den departamento di Chocó.
E dialogo di paz entre gobierno Colombiano y ELN a cuminsa na februari di aña pasa na Quito, Ecuador, unda a yega na un acuerdo pa un cese al fuego bilateral cu a inicia dia 1 di october 2017, y lo ta vigente te diamars di e proximo siman.
Dia 19 di december e ex vice-presidente di Colombia, Gustavo Bell, a wordo designa como e hefe nobo di e delegacion negociado di gobierno den e dialogo cu ELN, den substitucion di ex ministro Juan Camilo Restrepo.
Bell a sigura diamars pasa cu e ta sinti su mes “rasonabelmente optimista” encuanto un posibel proroga di e cese al fuego cu e guerrilla despues di 9 di januari.
E prome comandante di ELN, Nicolás Rodríguez Bautista, alias Gabino, a bisa diabierna pasa cu e mesa di dialogo cu gobierno di Colombia “no por wordo interumpi” pa e fin di e alto al fuego.
