(AP) — Ehecutivonan di criptomoneda a bay Capitol Hill ayera pa bisa cu nan industria di crecemento rapido ta compronde cu mas regulacion probablemente ta na caminda, pero nan no kier pa esaki caba cu e proximo ola di internet of mand’e offshore na otro paisnan.
Lidernan di e negoshinan mayor di mineria, intercambio y otro relaciona cu cripto a testigua pa cuatro ora y mey dilanti comite di servicio financiero di Congreso, cual tabata kier sa mas riba con e industria ta traha mientras ta considera con pa regula esaki. Mayoria di e discusion tabata centra riba proteccion pa inversionista den un ecosistema emergente cu algun critico a yama e ‘Wild West’.
Preguntanan di Congresistanan a varia desde discurso riba kico ta ‘stable coins’ – monedanan digital mara na dollar Mericano of algo similar pa tene un balor stabiel – na lo tecnico y arcano. Cantidad di pregunta a enfoca riba con stablecoins lo por yuda dollar Mericano mantene su status como e moneda mas importante na mundo, como tambe riba con recursonan digital por yuda e miyones di Mericano sin cuenta bancario of pafo di sistema financiero.
Con pa regula recursonan digital ta un asunto dificil, cu companianan operando bao supervision estatal y federal incompleto. Ainda tin desacuerdo si e Securities and Exchange Commission of otro agencianan regulador mester monitor cierto areanan di e mercado of si un cuerpo regulador completamente nobo ta necesario.
“Actualmente, mercadonan di criptomoneda no tin un marco regulatorio centralisa, lagando inversionnan den espacio di recursonan digital vulnerable pa fraude, manipulacion y abuso”, segun Dem. Rep. Maxine Waters, presidente di e comite di servicio financiero den Congreso.
Mientras tanto, cantidad di Republicano den e comite a pusha pa un man liviano riba regulacion. Rep. Tennessee, John Rose, por ehemplo, a puntra ehecutivonan con Congreso lo preveni innovacion di bandona Merca y bay den exterior. “Mi ta optimista cu den banda regulador, nos no ta asina leu di epunto ey”, segun Sam Bankman-Fried, CEO di bolsa di balor FTX. El a cita tin un marco regulatorio singular, unifica pa e intercambio di criptomonedanan actual y e contractnan futuro relaciona na nan, como tambe rekisitonan di auditoria pa e reservanan dis tablecoins, entre otro.
Alesia Haas, CFO di Coinbase Global, a bisa cu gobierno Mericano mester crea un marco regulatorio nobo pa recursonan digital. “Nos sistema regulatorio existente no ta traha efectivamente pa e rednan habri, descentralisa cu cripto a crea”, el a bisa den testimonio por escrito.
E tensionnan ta aumentando mientras e industria ta aumenta den tamaño y mas inversionistanan ta drenta e mercado, sea pasobra nan ta kere den futuro di cripto of pasobra nan ta buscando pa gana placa lihe. Criptomonedanan colectivamente tin balor di casi $2.4 triyon, casi e mesun tamaño cu Apple, Microsoft of otro di e stocknan mas grandi na mundo.
“Tin algo di cripto cu ta spanta hende”, segun Brian Brooks, CEO di Bitfury Group, un di e mineronan inicial di Bitcoin, mientras a bisa cu e pais no mester agrega otro regulador riba cripto. “Mi no sa kico e ta, por ta pasobra e ta nobo.”
Brooks anteriormente tabata cabesante interino di e Office of the Comptroller of the Currency, cual ta regula industria bancario, tempo cu Donald Trump tabata presidente.
Un critica grandi den direccion di criptomoneda ta con hopi electricidad nan ta devora. E mineria di Bitcoin so ta usa casi mesun hopi energia den un aña cu henter e mineria di oro rond mundo, of alrededor di mesun hopi cu Noruega of Ucrania, segun e Cambridge Bitcoin Electricity Consumption Index. Apenas un slcie chikito di discusion ayera a bay riba esaki, sinembargo.
E ehecutivonan testiguando na e audiencia tabata Jeremy Allaire, CEO di Circle; Bankman-Fried di FTX; Brooks di Bitfury Group; Charles Cascarilla, CEO di compania di infrastructura di blockchain, Paxos Trust Company; Denelle Dixon, CEO di Stellar Development Foundatrion, cu ta traha den pago y Haas di Coinbase.
Riba potret: Jeremy Allaire.
