Egmar Irausquin ta fungi como e Creative Director di e compania audiovisual Elite Productions & Entertainment. Den un entrevista cu Bon Dia Aruba e ta conta di su estudio, su trayectoria y con el a yega na un cara conoci den e mundo audiovisual y di video mapping na Aruba.

Ora el a cuminsa traha, Egmar ta conta, el a cuminsa traha como un videographer y tabata haci animacion grafico. Despues esey a desaroya mas den direccion artistico y creativo locual ta encera bin cu ideanan, bin cu otro tipo di diseñonan ariba un nivel mas grandi den e mundo audio visual.

Na mesun momento el a drenta tambe den e mundo di diseño di escenario, diseño di set ups pa casamento, pa eventonan corporativo, entre otro. Esaki ta nifica cu e ta enfoca tambe ariba e diseño di e look completo di e luga of di un evento.

Den esaki tambe, Egmar a agrega, el a drenta mas den loke ta diseño interior cu tambe ta cay mas o menos den e mesun ramo.

Aworaki como director creativo, Egmar a sigui conta, e ta enfocando ariba e compania den e aspecto di unda nan kier pa e compania ta, con e compania mester wordo mira pa publico, entre otro. “Mi no ta bezig ta traha animacion mas, pero mi ta mas ocupa cu e look di e compania of mi ta traha cu nos clientenan, entrega cosnan unico, bin cu ideanan unico,” el a indica.

Tempo e tabata jong Egmar tabata gusta arte. Ora cu el a bay Hulanda despues cu el a caba Colegio Arubano, na e momento ey e no a scoge pa haci algo den e mundo creativo, pero el a sigui su estudio den business. El a bay specifico pa small business retail management y el a haci management economy, cu ta algo full diferente di e mundo audiovisual y creativo.

El a splica cu mientras e tabata den e estudio ey, nan tabata traha den grupo unda nan mester a cuminsa un negoshi. Den e grupo ey automaticamente tur hende ta haya un rol y su rol a bira mas e visualisacion, esun cu ta purba di diseña tur cos, haci e presentacion mustra miho y ta eynan el a ripara cu e tabatin mas interes den e diseño grafico di e negoshi cu e negoshi mes.

Egmar a conta cu despues, papiando cu algun maestro nan a conseh’e pa asisti un academia di arte. El a solicita na un academia di arte na Groningen y el a haya luga na e filial di e academia na Leeuwaarden cu tabata un academia enfoca ariba pop culture, e luga perfecto pa e desaroya su pasion y talento. .

“Sin cu mi sa esey tabata e fit pa mi pasobra pop culture ta loke nos ta haci aworaki hopi cu nos ta gara cos, us’e, cambi’e, bolbe us’e y bolbe haci algo nobo di dje. E tabatin movemento di pop culture den dje cu musica, festival, teatro, baile y tur esey tabata wordo hinca den otro y nos tabata haya les di tur esey. Mi a desaroya mas den e parti di animacion y diseño 3D y esey mi a caba cune como estudio,” el a remarca.

E tempo ey Egmar tabata traha DJ di animacion den e clubnan. Esaki tabata encera cu ora e DJ tabata toca, e tabata para banda di dje y e tabata haci video den e luga, reaccionando ariba e canticanan cu e DJ tabata toca.

El a splica cu ora e tabata traha como DJ su style tabata hopi arte politico unda e tabata reacciona ariba sucedidonan di e dia of di e siman ey. E tabata usa imagennan di e sucedidonan aki, recrea nan y pone nan den e club.

Su trayectoria pa yega na unda e ta aworaki a cuminsa ora cu el a yega Aruba y a aplica pa haci animacion di video na Electric Festival e tempo ey y a traves di e festival el a cera conoci cu Elite Productions y di eynan e resto ta historia.

Pa loke ta su aspecto faborito di su trabao, Egmar ta conta cu na momentonan aki loke ta interes’e hopi ta cu e ta busca e siguiente cos mas nobo. “Door di mi experiencia tempo cu mi tabata bay scol unda nos mester a reusa algun cos, haci algo nobo di dje of bin cu ideanan nobo, aworaki mi ta kere mi ta wordo pusha pa haci esey. Esey ta un desafio pasobra bo no ta djis bay un caminda y haya e innovacion mas nobo y cumpr’e,” el a remarca.

Egmar ta conoci pa su trabao den video mapping tambe, un concepto cu no tabata conoci na Aruba. E ta conta cu el a desaroya su habilidadnan den video mapping ora cu e tabata na Hulanda y tabata DJ den club.

“Na cierto momento mi tabata proyecta ariba e murayanan y e murayanan tabatin poster. Mi tabata proyecta ariba e poster y mi tabata pone tur e posternan ey haya bida. Por ehempel tin un muhe riba e poster pinta y mi tabata cambia su paña of e mannan ta move. Mi a cuminsa involucra e efecto di mapping eyden y asina nos a cuminsa drenta den e mundo di mapping,” el a agrega.

Ora cu el a yega Aruba Egmar no a spera cu mapping ta un gran cos y el a pensa cu ya nan a haci’e caba. Na momento cu el a cuminsa traha na Elite pa haci animacion di video, nan a puntr’e si e sa algo di mapping y di eynan el a cuminsa cu video mapping na Aruba.

“Ora mi a haci e prome testnan hopi hende a ripara cu mi ta haciendo algo cu no tabatin na Aruba ainda y lo ta hopi interesante. Asina mi a cuminsa involucra full den video mapping. Y awo nos a keda desaroya y nos ta haci videomapping riba edificionan echt grandi,” el a finalisa.