(AP) – Israel y Hamas riba dialuna a duna un reaccion neutral na e proposicion di Egipto pa caba cu e guera. Sinembargo e enemigonan di añanan largo no a directamente rechasa e plan tampoco, treciendo dilanti e posibilidad di un ronda nobo di dialogo diplomatico pa caba cu e accionnan mortal di Israel contra Gaza Strip.
E plan Egipcio ta haci yamado pa un liberacion di rehennan den fase y e formacion di un gobierno Palestino cu ta consisti di expertonan pa administra Gaza Strip y West Bank, segun un oficial Egipto y diplomatico Europeo cu ta familiar cu e proposicion. E oficial di Egipto a informa cu e detayenan a ser forma cu Qatar y a ser presenta na Israel, Hamas, Merca y gobiernonan Europeo. Egipto y Qatar ambos ta mediador entre Israel y Hamas, mientras Merca ta Israel su aliado mas cercano y un poder clave den e region.
President Israeli Benjamin Netanyahu no a comenta directamente riba e proposicion, pero papiando cu miembronan di su partido Likud, el a bisa cu e ta determina pa sigui cu Israel su accion den respuesta na e atake di dia 7 di october di parti di Hamas. “Nos lo expande e lucha durante e dianan binidero y esaki lo ta un bataya largo cu no ta cerca di ta cla,” el a expresa. Hamas a sigui cu lansamento di rocket contra Israel.
E proposicion cu Egipto a trece dilanti aparentemente ta choca cu Israel su intencion di derota Hamas y cu Israel su insistencia riba mantene control militar riba Gaza pa un periodo extendi despues di e guera. Sinembargo, Netanyahu ta enfrenta presion domestico pisa pa yega na un trato pa asina por trece back cas e mas di 100 Israeli rehen cu ta permanece den captividad na Gaza. Mientras el a priminti di sigui cu e guera durante un speech na Parlamento, familiarnan di e rehennan tabata interumpi su persona y grita pa nan regreso inmediato.
E cantidad di fayecimento di soldaatnan Israeli den e operacion tambe ta menasa di baha e sosten publico pa e guera. Ehercito Israeli a anuncia e morto di 2 soldaat mas riba dialuna, cual ta subi e cantidad total na 156. Netanyahu su Gabinete di Guera ta premira di reuni dialuna, aunke no ta cla si nan lo trata e proposicion durante e reunion aki. Pa loke ta trata Hamas, nan no a oficialmente rechasa e proposicion, pero tampoco a laga cla si nan lo keda di acuerdo pa otorga e poder despues di a controla Gaza pa e ultimo 16 aña. Izzat Rishq, un oficial di Hamas ken ta sospecha di ta basa na Qatar, a haci un declaracion unda el a ripiti e grupo su posicion cu e no lo negocia sin un “fin completo na e agresion.” El a bisa cu Hamas no lo acepta un “tregua temporario ni parcial pa un periodo cortico di tempo.”
