Director di AZV Edwin Jacobs ta enfatisa necesidad pa pidi recibo na supermercadonan den bario

Mester bira mas eficiente cu e tempo cu pacientnan di AZV ta keda Colombia pa tratamento medico. Asina Director di Organo Ehecutivo di AZV Edwin Jacobs a bisa ayera. Despues di analisa henter e proceso a conclui, cu aunke pacientnan ta bay Colombia cu nan prome cita regla, e periodo pa e siguiente ta mucho largo. Aki ta unda kier traha pa elimina esaki, cu ta na beneficio di e pacient y tambe e gasto di AZV.

Colombia ta keda e destinacion preferi unda AZV ta cumpra servicio medico den exterior. Pa e aña aki ya a cumpra 19.7 miyon florin na cuido medico den exterior.

Na September lo drenta un proceso di destaho pa yega na acuerdonan mas bentahoso posibel cu e hospitalnan cu ta brinda servicio na aseguradonan di AZV. Durante e conferencia di prensa, Jacobs a ilustra cu ley ta prescribi e derecho pa cuido den exterior, pero tambe e procedura, cu ta inclui evaluacion positivo di parti di un comision independiente. Colombia ta keda e destinacion principal pa servicio medico specialisa, sigui pa Hulanda y Merca.

E gasto na 2021 pa cuido medico regular den exterior tabata 27 miyon, y riba dje a bin mas di 7 miyon pa cuido intensivo pa COVID-19. Pero parti di e gasto regular a keda controla debi cu IMSAN a cuminza duna servicio di operacion di wowo y radiologia. Asina mes ta manda un promedio di 45 persona pa luna pa Colombia pa ricibi cuido specialisa.

Casi 40 porciento di e grupo aki ta bay Fundacion Santa Fe di Bogota cu ta brinda specialismo profundo, sigui pa Hospital Internacional na Bucaramanga, Valle del Lili na Cali y Fundacion Cardiovascular na Bucaramanga. Entre otro a manda pa operacionnan di wowo, ortopedia, operacion di curazon, y urologia.

Areanan di mehoracion, segun evaluacion ta entre otro e cantidad e tempo cu ta warda pa e di dos cita cu specialista na Colombia. Un motibo ta cu pacientnan no ta cla pa e intervencion pasobra e sucu y/of presion no ta bou control. Como tal ta cuminza proyecto piloto, unda unicamente ora tur e co-morbilidadnan aki ta bou control ta manda e pacient pa tratamento specialisa na Colombia. “E mester sali di Aruba ora cu e ta cla pa operacion.” E hecho cu pacientnan mester keda un averahe di 36 dia ta pasobra hopi biaha mester warda pa e sucu y/of presion ta bou control. E proyecto piloto lo midi e impacto riba e gasto pero tambe experiencia di e pacient. “Keda 36 dia den un camber chikito no ta nada agradabel,” Jacobs a bisa. Tambe lo duna e acompañante mas informacion pa e realisa e peso di responsabilidad.

Controla aumento di gasto

AZV no ta premira reduccion di gasto, sino mas bien control di locual ta paga pa cuido medico den exterior, pa asina esaki no crece. “Den tempo, si no control’e, e lo por crece cu cinco a seis porciento, y kier mantene e crecemento na dos. E perfil di e pacient local no ta mucho saludabel, cu ta nifica cu mester di keda cu cuido specialisa den exterior.”

AZV tin asistencia di un broker y un compania cu ta ‘audit’ e recibonan cu e institucionnan hospitalario ta cobra. “Aki ta sigura e legitimidad di e cobranza. Despues di 20 aña, nos por bisa cu tin un control riba e proceso.” Segun Jacobs, e otro islanan di Reino ta admira con Aruba ta controla e gastonan di cuido medico na Colombia. “pero e area cu mester traha riba dje ta e comunicacion entre e specialista na Aruba y esun na Colombia. Mas comunicacion adelanta entre specialistanan ta nifica miho experiencia pa asegurado y tur esey lo ta inclui den e licitacion nobo.”

Entrada

Ta premira crecemento di entrada cu 3.1 porciento mas cu locual a presupuesta na 2022, danki na BAZV cu ta resultado di turismo. Entrada di prima mes no ta creciendo mucho. Pero e gastonan di cuido tambe a crece, cu mas di 5 porciento, y esaki ta pasobra no a logra introduci e recorte di 60 miyon den gasto di AZV. Pues, e meta ta percura pa minimalisa e contribucion di Pais Aruba na 0 y tambe baha e gastonan cu 60 miyon. “Ta den e dos liñanan ey lo sigui maneha e fondo pa resto di 2022.”

Aunke cu ta introduci e five wave model, toch ta keda 18.2 miyon bou di e meta. Gasto di administracion a baha un poco, pero cu tur e otro gastonan mester di 12.5 miyon di Pais Aruba. E ta casi 10 miyon mas cu a proyecta na inicio di 2022. “Esaki ta nifica cu mester keda monitor e entrada. No tin espacio pa reduccion di gasto, al contrario. HOH Y INSAM ta pidiendo aumento, mescos cu otro sectornan. Pero sin entrada no por tin aumento. Presion pa gasto t’ey. E diferencia den fondo lo ta basa riba entrada.”

Pidi recibo

P’esey ta urgi comunidad pa yuda percura cu locual ta paga na BAZV yega AZV., Jacobs tabata na dos supermercado Chines e fin di siman aki unda el a nota cu ta elimina benta di e caha di placa. Ora el a reclama e cahera, e ultimo a pretende di no por compronde Papiamento. “Nan ta cobra consumidor e BAZV, pero ta elimin’e di e mashin. AZV no ta ricibi e sumanan aki. Pues ta comunidad mester yuda y mester pidi recibo pa sigura cu e mashin ta registra.” Jacobs a ilustra cu sectornan di supermercado den bario y salonnan di beyesa ta evita di duna recibo pa keda cu e placa di BAZV. “Pidi bo recibo pa por sigui cumpra cuido.”

Lista positivo nobo

Mientrastanto, UO AZV a tene un sesion informativo pa dunado di cuido riba e lista positivo nobo cu ta drenta na vigor entrante October 1. E reunion a tuma luga na Renaissance Convention Center y tabata pa dokter di cas, assistentnan, boticario y assistentnan di boticario. E ta parti di e campaña di informacion cu AZV lo tin pa informa comunidad riba e lista positivo nobo. Ademas lo tin un liña di ayudo cu por yama si tin pregunta, Jacobs a informa.