A traves di un comunicado di gobierno, a informa cu diaranson mainta, Prome Minister Evelyn Wever-Croes a reuni cu miembronan di Eerste Kamer y comision di relacion di Reino. Mirando e importancia pa miembronan di Eerste Kamer, cu ta esnan cu tin cu tuma decisionnan riba cierto caso pa Aruba, tin e informacion corecto, Prome Minister a pidi un reunion y a wordo otorga esaki.
Wever-Croes a indica cu durante e reunion el a haci un presentacion riba con Aruba ta recuperando economicamente. El a papia riba turismo cu ta creciendo, riba desempleo cu ta bahando, y riba e tema financiero, indicando cu Gobierno ta cumpliendo cu e normanan di surplus awor, pa otro aña, y mas añanan nos dilanti. Di nan banda tabata tin hopi pregunta, y segun prome minister, tur a wordo contesta.
Segun e comunicado, e asuntonan mas relevante pa e Comision di Reino y su presidente, Paul Rosenmoller tabata inclui diversificacion di economia y kico Aruba ta haciendo pa esaki; plannan pa elimina burocracia; relacion entre Aruba, Corsou y Sint Maarten; desempleo; y mas cu claro, e negociacionnan andando entre Aruba y Hulanda riba e ley di supervision financiero.
Wever-Croes a indica di ta “sumamente gradici cu nan a duna mi e oportunidad pa duna nan tur e informacionnan necesario, cu por facilita nan na momento di tuma decision cu ta regarda pais Aruba. Tambe mi ta contento di por a delibera cu profesor Nicolai, cu ta parti di e comision, riba topiconan importante manera e aspecto constitucional, LAft, y e rijkswet. Aruba a haya hopi elogio, cu ta duna mi un sentimento di satisfaccion pa sa cu tur nos esfuersonan ta wordo aprecia y admira.”
Anteriormente, Wever-Croes, kende ta actualmente na Hulanda pa un bishita di trabao, a indica cu hunto cu minister Plenipotenciario na Hulanda, Ady Thijsen, a reuni cu Secretario di Estado pa Relacionnan di Reino, Alexandra van Huffelen y su delegacion. Premier Wever-Croes a expresa cu e tabata un “bon reunion na unda varios tema di relevancia pa Aruba a wordo trata. Gobierno di Aruba y Hulanda ta na mesa ainda pa purba yega na e miho interes pa pais Aruba.”
Manera Bon Dia Aruba a publica recientemente, Conseho di Minister di Reino (Rijksministerraad, RMR) durante nan reunion diabierna no a duna aprobacion na e plan di gobierno di Aruba, presenta pa prome minister Evelyn Wever-Croes, pa amiendanan den ley di supervision financiero. Na lugar di aproba e propuesta di gobierno di Aruba, RMR duna mandato na Secretario di Estado, Alexandra van Huffelen pa asina e por negocia den nomber di RMR sin cu mester warda te e siguiente reunion di Conseho di Minister di Reino.
