Durante pandemia, comunidad por a mira cierto casonan di personanan cu ta wordo saca for di nan cas pa diferente motibo, entre un di nan tabata pa via di debe.

Tambe tabata existi e caso di un persona cu a wordo saca for di un cas di FCCA pa motibo di debe atrasa, den caso aki deurwaarder a manda un carta na persona aki na unda ta wordo splica e motibonan di desaloho y cu tin un sentencia di hues.

Den casonan asina, Bon Dia Aruba a tuma contacto cu director comercial di Fundacion Cas Pa Comunidad Arubano (FCCA) pa duna un splicacion y informa kico ta pasa den momentonan aki y con e procedura ta wordo implementa.

Tromp a relata cu ora un persona ta huur un cas cu un acuerdo esey tin condicionnan, depende di entrada di persona por ehemplo, si e ta gana te cu 3.125 florin pa luna e por yega na remarca pa por ricibi y haya subsidio di gobierno.

Ora e persona ta drenta den cas, tambe ta existi cu tin ‘hendenan problematico’ manera Tromp a sigura, cu por causa un poco di molester den bario y den ora ey algun miembronan di FCCA ta bishita nan, tin otro caso di personanan cu ta atrasa den cual ekipo di cobransa tambe ta papia cu nan.“E ta un proceso basta largo” el a sigura.

Ora cu ta yega e momento cu un persona no por paga mas, FCCA ta acudi pa nan parti legal y esaki ta bay pa hues e cual ta e unico cu evalua e caso y por tuma un decision pa un hende por sali for di cas na Aruba.

“Bo por debe mi cuanto cu bo kier pero mi no por saca bo, p’esey nos ta bay Corte pa haya un decision”, Tromp a expresa.

Tambe, el a manifesta cu pa varios biaha nan a haya cu e hende ta bisa cu deurwaarder ta esunnan cu ta sak’e e hende for di cas pero segun Tromp a bisa “nan ta just eherce e funcion di bisa y entrega Corte su decision”.

E proceso aki ta igual cu ora un persona tin un hipoteca, Tromp a comenta cu tin biaha personanan ta yega na un areglo pero asina mes “e hendenan no ta cumpli” tin algun procesonan cu ta dura 9 luna, por lo menos, “FCCA no ta un banco, ta un instituto riba su mes, un fundacion priva”, el a declara.

Di e manera aki, Tromp a afirma cu e ta recomenda pa tur hende pa no sconde pa nan debe y enfrent’e cu dignidad, pa motibo cu ora nan ta yega na FCCA nan por yega na un areglo pero mester tin e boluntad di dos banda, asina mes tin personanan cu el a sigura cu a bisa cu nan no por paga tur luna pero ora su entrada ta wordo analisa e persona ta gana un salario.

Algun dianan pasa hendenan riba rednan social ta comenta y duna su opinion riba casonan specifico pa lo cual Tromp a bisa cu “hopi hende no sa con e procedura legal ta bay”, di mesun manera el a comenta cu den temporada di pandemia tin hende cu ta wordo bisa cu “mester stop di cobra hende y esey no por”.

El a splica cu den lunanan di pandemia manera ta conoci, hopi hende a perde nan trabou y nan salario pero di mesun manera nan a duna seis luna pa personanan aki cu no por paga door cu e interes ta sigui core.

Na e momentonan aki nan a institui un grupo chikito na unda nan ta papia cu tur cliente, “pasobra no tur persona ta pensa y actua mesun cos den situacion aki”, por ta cu un persona mester di seis luna, tin otro cu por paga interes so of baha e interes si e persona mes a pidi esey, pero esey no ta e caso di tur hende, tin cu papia cu tur di nan pa wak con su situacion ta.

“Esunnan cu ta bisa pa no cobra hende ta dunando un mal informacion”, Tromp a sigura y tambe a manifesta cu na e momentonan aki nan mester papia cu aproximadamente 1.200 persona, entre nan tin algun cu no a perde placa den lunanan aki pero igual nan a pidi pa financia e debe y extende pa un temporada mas largo, “pero nos mester atende tur y e manera ideal ta pa atende nan di manera personal pa asina por haya mas informacion”. Tromp a finalisa.