Ayera mainta, Director nobo di e companianan Arubus, Arutram y Aruparking, Edwin Mohamed, a ofrece un conferencia di prensa na medionan local y a duna informacion tocante e maneho nobo di e companianan aki y e proyectonan cu nan tin pa mehora nan servicio.

Edwin Mohamed a comenta riba e ekipo cu ta acompaña su persona den e directiva di Arubus, el a menciona cu e manera di traha ta bay ta den ekipo y cu cada un di nan ta confrontando diferente reto.

El a expresa cu Arubus tin un reto den area financiero, di servicio, material y mantencion, y pa loke ta trata Aruparking tambe tin reto financiero, hunto cu un structura nobo y maneho cu un vision diferente pa cada un di e companianan aki.

Pa loke ta concerni Arubus, el a expresa cu “Nos ta bay duna mas balor pa e placa cu un persona ta paga ora e ta subi un di nos busnan.” E flota di bus nobo cu ta biniendo dentro di poco lo tin integra servicio di Wi-Fi, airco y ademas di esey, ‘charging station’ pa hende por charge nan telefon.

Mohamed a comenta cu di parti di Arubus mester mehora ta e ‘core business’, loke ta e busnan cu ta pasa pa transporta e clientenan pa e destino cu nan ta desea.

Pa Aruparking, el a bisa cu lo kier facilita e modo di pago. Nan kier implementa un aplicacion pa e manera cu e clientela di Aruparking ta bay paga, cu lo ta mas facil, por ehemplo cu por paga tambe cu credit y debit card.

Tambe el a manifesta cu parti di e maneho nobo ta pa trece parkeo gratis cu 555 vak blanco, 496 vak geel cu ta keda pa ‘vergunning houder’ y e parkeo paga cu 584 vak. Ta spera pa den futuro cercano por presenta esaki na comunidad.

Mohamed a splica cu pa loke ta toca Arutram, nan lo kier mantene e servicio y crea e posibilidad pa atende mas negoshi cu Arutram y cu nan lo kier crea un aliansa cu e negoshinan den centro di ciudad y pa por trece mas turista pa centro di ciudad.

Tocante e alternativanan di ruta, Mohamed a señala cu el a sinta hunto cu DOW pa nan por trece dilanti e camindanan nobo, como tambe barionan nobo cu tambe mester di un ruta di bus. Pa loke ta trata Watty Vos Boulevard, el a expresa cu hunto cu DOW nan mester sinta pa wak con nan ta bay haci uzo di e caminda aki.

Bon Dia Aruba a puntra riba e situacion di Aruparking den area di Playa, specificamente Caya Grandi, unda cu e comunidad no ta bay na e area ey pa via cu nan no ta haya luga pa para nan auto, hopi vak geel ta bashi gran parti di dia, pero hende no por haci uzo di nan. El a contesta cu tin hende cu ta haci mal uzo di parkeo y a sigura cu den e maneho nobo nan ta bay pone mas presion riba esunnan cu permiso pa vak geel cu lo por bay un poco mas pafo di centro di ciudad y esun cu ta bay haci compras na Playa por haya un luga pa para nan auto. Sinembargo, e plannan no tin fecha ainda pa keda cumpli. Tambe e maneho di multa y otro sancion contra esunnan cu no ta cumpli, entre otro pa e dificultadnan legal cu aparentemente tin, ta aspectonan riba cual e companianan ta trahando ainda.