Edwin Jacobs, director di SVB: Seguro di accidente ta compensa seguro di malesa, cual ainda tin reto

Director di SVB, Edwin Jacobs, a splica di fondo pa seguro di malesa y accidente, tambe di e fondo di cesantia den administracion di SVB.

Otro seguro cu nan ta atende cune ta esun di malesa y accidente, algo cu ta hopi ‘importante pa comunidad’. Seguro cu ta cubri trahado den sector priva cu pa motibo di malesa of accident no por traha.

Den aña 2018, e cantidad di trahado cu a registra cerca SVB a aumenta cu 6.5%, kiermen 2,772 trahado adicional a bin acerca. “Esaki ta pa e crecemento di economia, pasobra nos tabatin 135 dunado di trabou, pero tambe nos esfuerso cu nos ta haciendo den cuadro di boet administrativo pa control riba empresa cu tin trahado cu no ta registra”, Jacobs a splica.

Tambe e ta remarca cu ta mira e cantidad di relacion di trabou cu tin a aumenta cu 12.7%, cu un trahado por tin mas cu un relacion di trabou. E persona por traha part-time na dos diferente luga, y pa ambos ta wordo sigura.

Sinembargo, Jacobs ta splica cu a pesar di tur aumento cu ta representa mas prima pa e seguro di malesa y accidente, e gasto di malesa a aumenta. “Nos ta studiando pa check di unda e ta bin. Prome indicacion ta cu malesa cronico ta afectando e seguro di malesa.”

Segun Jacobs, e ultimo aña a trece un bon grado di coleccion di prima di malesa/ accident. SVB mes ta cobra e grado di coleccion pa 2018 tabata 95%, cobransa total di 42.200.000 florin. 40.000.000 ta paga, y falta 2.200.000 cu ta buscando cerca doño di trabou.

A pesar di aumento den entrada, por nota cu seguro di malesa a conoce un deficit di 8.600.000 florin. Jacobs ta expresa cu esey tin atencion y ta un punto di preocupacion cerca nan. Sinembargo, e ta bisa cu tin cu analisa bon kico ta pasando den fondo pa por presenta proposicion pa keda mantene fondo saludabel.

Seguro di accident, segun Jacobs, si ta duna un surplus di 4.100.000 florin, ta tir’e den e fondo di malesa. “Na final di dia, entre e dos fondo aki a keda un deficit di 4.500.000, cu tin studiando kico ta pasando den seguro.”

Den e prome kwartaal di 2019, E AOV di malesa e relacion di trabou 5% a aumenta. Nan a colecta 47% di cobransa cu a manda 44.000.000. Den e prome 3 luna a colecta 20.600.000 florin.

Sinembargo e resultado pa malesa ta keda negativo, cu 1.100.000 florin den deficit (pa seguro di accidente 1.200.000 florin) pero segun Jacobs a resultado total ta positivo, y proyeccion ta cu e seguro di malesa lo caba cu 4.200.000 florin den deficit, 4.800.000 florin den positivo, pues ‘e ta recuperando, pero seguro di malesa ta dificil’.

Durante control a sigui duna boet na comerciante cu no ta registra nan empleado? Jacobs ta contesta cu na momento cu ta constata cu no a cumpli cu seguro di malesa y accidente, e trahado ta traha cu su proceso verbal, y proceso ta cuminsa cu doño di trabou ta ricibi multa administrativo.

Sinembargo, Jacobs ta bisa cu ta bon pa recorda cu ley ta duna SVB 3 aña pa impone multa. Si ta constata awe, tin 3 aña pa manda e multa pa dunado di trabou. Nan tin control intensivo, a pesar cu ta informa den diferente forma y conscientisando e dunado di trabou pa cumpli cu e ley, ta keda constata cu tin trahado cu ta traha sin proteccion di seguro di malesa y accidente.

“Mi tin cu bisa cu si controla e violacion, e multa lo ta mas halto. En bes cu bo mes bin SVB inscribi trahado, di mes lo tin multa ta haya, pero ta mas abou. Awo si trahado tin miedo, nos lo laga manera anonimo. Tur tip cu drenta ta lag’e anonimo, y nos tin forma cu ta logra haya informacion cu nos tin mester, pero tur hende por duna informacion anonimo y nos hende ta sali pa controla esaki”, Jacobs a aclaria.

Fondo di cesantia

E di 5 fondo cu SVB ta atende cune ta esun di cesantia. E seguro ta ora un trahado perde trabou sin cu el a causa esaki, pues ‘nan no tin culpa di retiro’. E doño di trabou ta e prome cu ta wordo yama pa paga cesantia. Den caso cu e doño di trabou no por paga esaki, e trahado nunca por sali perhudica, y ora tin un fondo di cesantia cu por acudi.

Segun Jacobs e seguro ta bayendo den un resultado positivo di 700.000 florin, ya ‘e fondo ta fuerte tambe’. Jacobs ta expresa cu tin reserva di 22.900.000 florin, un fondo fuerte cu ta yudando e seguro di malesa y accidente pa sali di nan problema.

“Esey nos por bisa ta resultado pa loke ta trata 2019, cu ‘highlights’ mas importante pa seguro di biehes. E fondo ey ta den recuperacion. Reserva ta creciendo y cu nos seguro di malesa mester mas atencion, pasobra ta den deficit atrobe”, Jacobs a bisa.

Si un trahado no ta bon informa pa e seguro aki, y no sa cu por haya cesantia, unda e tin cu acudi? Pa nan derecho nan por pasa SVB. E ley di cesantia ta duna e trahado e oportunidad te cu un aña despues cu ta retira, pa por haci uzo di cesantia via fondo derecho.

E ultimo pago tin 1 aña pa acudi na SVB. E conseho cu Jacobs semper ta duna pa acudi na SVB. “Laga nos mes informa bo pa haci peticion, si no tin derecho nos lo bisa bo, no warda tempo pasa y despues bo ta yega laat, pasobra tin un aña pa haci e peticion.”

Jacobs a comenta cu a cuminsa pone den sistema digital nobo; mas 50% di inscripcion ta digital, digitalisacion ta bayendo super bon. Jacobs ta splica cu na 2020, nan kier tin’e na unda nan ta desea di tin servicio completamente digital. Un parti di crecemento ta debi na control, pero un parti a bin di extra actividad economico, cu ta rekeri di trahado.