Tempo cu crisis Covid-19 a yega na Aruba, niun hende tabata prepara pa esey loke a causa cu algun companianan den afan pa baha nan gasto no a sigui paga SVb y a saca nan trahadonan for di servicio.
Asina a declara e director di SVb, Edwin Jacobs pa loke tambe a menciona cu nan lo duna e companianan aki un chens pa nan por drecha e situacion. Den esaki el a expresa cu dia 15 di maart, tur hende cu tabatin un trabou ta haya subsidio y e compania tin cu informa nan si algun persona no ta den servicio mas. Tambe tin companianan cu a saca nan trahadonan afo, specialmente esun di uitzendbureau.
Segun Jacobs a expresa, e situacion aki a trece dilanti cuanto mal dunado di trabou ta existi na Aruba, pa loke a sigura cu ta un gran cantidad. Pero aworaki cu pais ta den crisis, cosnan asina no ta dura pa semper y despues di crisis nan ta bin back pa e dunadonan di trabou aki.
Asina mes el a señala cu nan ta bay conseha gobierno pa pone reglanan mas estricto cu por pa duna empresa mas permiso estableci, pa motibo di abusonan cu a wordo cometi den periodo aki.
“Ora cos ta bon, bo ta mira cu e ta bay den otro cartera, ora cos ta malo nan ta saca for di cartera di trahadonan”, Jacobs a afirma.
Asina mes, el a trece dilanti di e crisis aki tur hende mester siña for di dje. Mester fortifica e posicion di e trahado, ademas lo recomenda gobierno tambe pa cambia e sistema di cesantia, cu hopi empresa ta pone riba nan buki, pero nunca tin e placa.
Otro di e puntonan cu el a papia ta cu tin hende cu tin mas di 10 aña trahando den mesun empresa cu e mesun salario, ‘algo no ta bon’ y esey ta demostra cu tin cosnan cu tin drecha.
