13mei, NW, duana (1).JPG

Ayera mainta na waf di Barcadera duaneronan tabata den accion di protesta. Esaki ta pa e echo cu nan no ta di acuerdo cu e compania di siguridad ASTEC a indica cu nan tin cu controla e duaneronan cu ta yega waf y segun Sr. Edward Maduro, president di SADA. Pa e duaneronan, e trahadonan di siguridad no tin e derecho di pidi un duanero baha for di auto pa controla. Mester tin respet na duaneronan, kendenan pa ley tin e derecho di controla riba waf. E landsverordening ta mas cu un “huis regelment.”

 

Pa hopi tempo caba ASTEC ta esun cu ta haciendo e parti di control riba e siguridad pa drenta waf. “Awo a resulta cu nan ta purba di baha e ambtenaar di duana for di auto pa x motibo,” segun Sr. Maduro na Bon Dia Aruba.

Na momento cu e duaneronan a bay investiga e motibo, nan a bin haya sa cu aparentemente tin un protocol, un “huis regelment.” Den bista di e duaneronan esaki ta conta pa civil y no pa Duana ambtenaar cu a huramenta, cu ta autoridad. “Nos ta un cuerpo, nos ta un autoridad, pasobra waf ta parti di nos area di trabou,” el a sigui bisa. Den e verordening di duana nan ta yama esaki area di duana. Tur container y carga cu ta riba waf ta cay directamente bou control di duana y no di e compania di siguridad ASTEC.

 

Controla Duana

Aki nan ta unda e discrepancia ta sinta. E trahadonan di siguridad di ASTEC kier haci control riba e Duana. E trahado di siguridad ta eynan pa tene siguridad, pero ora ta toca autoridad mester hala un liña, Sr. Maduro a indica. Esaki ta pa motibo cu un trahado di siguridad cu no ta huramenta y no sa di unda el a wordo saca. Sr. Maduro no kier ofende ningun hende. Un persona cu kier traha den Duana, mester pasa den un procedura prome cu e bira un Duana ambtenaar, pasobra nan tin cu pasa un “antecedentenonderzoek,” nan tin cu bay opleiding, y e caminda cu nan ta huramenta pa asina por haci nan trabou como duanero.

 

Duna respet na autoridad

E trabou di Duana ta pa controla waf. E duaneronan ta sinti cu e trahadonan di ASTEC ta impone riba nan autoridad, riba nan derechonan. “Si bo mira auto di Polis yega, auto di Duana yega, bo tin cu ga van uit cu ta autoridad nos ta,” el a sigui bisa Bon Dia Aruba. “Kiermen bo tin cu duna respet na e autoridad eynan. Kico mas bo kier? Bo ta mira e uniform, bo ta mira e auto di Polis of di Duana. Bo ta mira cu nos ta presenta nos mes cu nos legimaties bewijs.” Esey ta mas cu suficiente, Sr. Maduro a bisa.

 

Landsverordening

Duaneronan tin cu haci e control riba waf, nan tin e bevoegdheden contra tur hende na waf sin excepcion. Un trahado di siguridad no tin e bevoegdheid aki. “Bo por tin un huis reglement. Pero un huis regelment nunca por bay riba un landsverordening, esey ta ley. Eynan ta caminda cu e duaneronan a bisa ta basta. Director di Duana tambe ta na altura y ta sostene e duaneronan den nan accion. Segun Sr. Maduro, e director tambe ta di e pensamento cu mester cuminsa respeta Duana ones and for all, pasobra nan ta autoridad. “Nos no ta un cuerpo di siguridad, nos ta Duana ambtenaar, autoridad di parti di Aruba.”

 

Chauffeur rabia

Mientrastanto chauffeurnan di companianan di transporte tabata rabia cu e accion di e duaneronan, ya cu nan blokia e entradanan. Pa e chauffeurnan esaki ta pone cu nan trabou a bay atras pasobra nan a cay laat.