Ayera 26 di januari a conmemora Dia Internacional di Aduana, resaltando e relevancia cu e funcionarionan publico aki tin pa un pais, specificamente pa Aruba. Den esaki, Bon Dia Aruba a tuma contact cu Sindicato di Aduana di Aruba (SADA) na unda su presidente a señala cu e trahadonan den e area aki ta sinti nan mes mal contento pa diferente punto.

Edward Maduro a sigura cu departamento di Aduana tin basta reto den ultimo añanan aki. “Como cuerpo di Aduana nos ta pasando no den e miho momento, tin hopi demotivacion, mal contento di e manera con e cos ta bayendo. Y esey tin di haci como por ehemplo, cu nos tin añanan wardando riba un edificio nobo. Constantemente nos ta den corte cu casonan di ambtenaarnan, unda nos tabatin e caso grandi di salario cu reorganisacion di Aduana, cu te dia di awe for di 2018 nos ta den corte, nos no a keda cla ainda. Ta cosnan cu ta pone cu ambtenaar ta demotiva.”

Ademas di esey, el a trece dilanti cu tin falta di material, “algo cu bo ta pensa, cu ta suppose di ta automatico, cu bo ta provee e dienst. Y nos ta purba traha cu locual nos tin, den sentido di sinta negocia cu minister pa por yega na unda nos por yega mas facil, pasobra di un banda bo ta purba compronde cu nan tambe tin un tarea pa cumpli cune, pero ora bo tin un dienst di Aduana cu ta hinca den caha di gobierno 350 miyon florin pa aña, mi ta kere bo tin cu duna un tiki mas di atencion pa asina purba al menos provee e material cu mester pa traha,” el a bisa.

Esey ta e retonan cu nan tabatin y cu te ainda nan tin, manera Maduro a señala. Nan ta premira cu e retonan aki lo bay keda, pa motibo cu segun Maduro su opinion, esnan cu tin cu tuma e decision “kisas no ta sinti of no ta compronde e pakico. Si acaso bo tin un ley di un management cu no ta yuda mucho tampoco, e ora e ta bira un problema mas grandi. Si bo tin un management cu a pesar di e retonan cu e doñonan di trabao tin, esta gobierno, bo ta keda haci bo esfuerso pa por yega unda bo tin cu yega. Pero e gran mayoria di nos ta sinti cu bo ta wordo neglisha no solamente door di e hefe pero tambe door di bo management, e ora bo ta bay ta mas leu for di cas,” el a sigura.

Uniforme ta un otro punto cu Maduro a bin cune pa loke ta trata e retonan. Segun el a afirma, ultimo tempo nan a haya uniforme cu “no ta esun di e miho den hopi aspecto, no ta cumpli cu locual e uniforme mester representa. Den e seccion mes bo tin tekort di material pa nan haci nan trabao. Den pasado nan a yega di haya material for di US Customs, pero for di bo dunado di trabao mes of e material cu mester pa traha, bo no ta haya. 15 aña pasa mas o menos nos a haya herment y ekiponan sofistica e tempo ey pa haci bo trabao, pero awe e hermentnan ey ya caba a bira obsoleto y nan no a bin cu otronan mas nobo. Mi ta supone cu nan kier haya donacion. E ta jammer pasobra bo ta wak cuanto placa Aduana pone den caha di gobierno y locual bo mester pa traha cune no tin,” el a expresa.

Pa su persona, esaki ta cosnan simpel cu nan tin mester pa nan por haci control riba barco of container. Di mesun manera e trainning cu mester bin, “practicamente tur cos cu ta necesario pa bo tin un Cuerpo di Aduana bon getrained, bon capacita, cu hermentnan cu ta necesario pa e trabao. Esey ta conduci tambe pa e demotivacion y e mal contento.”

Ademas, den pasado a yega di trece dilanti e parti di bevordering cu tambe ta un otro problema cu “no ta solamente den Aduana, sino den tur dienst di gobierno. Esey ta un problema hopi grandi, bo tin un departamento di Recurso Humano cu no tin nada di humano den dje, tur ambtenaar cu tin cu haya nan bevordering tin cu pasa un caminda di cruz cu e pretexto di Landspakket cu ta un acuerdo cu Hulanda; pero e manera con esaki ta ser implementa no ta esun cu eigenlijk ta cuadra cu afspraak riba e nivel ey. Y ora bo wak e prestatiemanagement tambe, ta un otro punto cu no solamente Cuerpo di Aduana ta demotiva y obstina, e ta conta pa otro ambtenaar tambe den aparato gubernamental, esey ta otro tema cu nos ta bezig cune. Indexering awor a bin riba mesa, kiermen ta hopi cos tin cu ta afecta e Cuerpo di Aduana,” Maduro a enfatisa.

Den e parti di opleiding, el a declara cu nan tin tekort di personal y nan no por caba cu e reorganisacion. Y sin lubida e edificio nobo, cu segun Maduro desde 2016 casi tabata cla y despues gobierno a cambia a bisa cu no. “Añanan ta pasa. Prome cu eleccion 2021 nan a priminti cu esey ta bay sucede, pero eleccion a yega na 2021 y te ainda tres aña despues na 2024 ni sikiera a rosa e tereno, corda pone e prome piedra.”

Pa finalisa, Maduro a laga e mensahe cu nan ta keda optimista y cu e fe cu algun cos lo cuminsa drecha back. “Den coleganan cu a pesar di tur cos nan ta cumpli cu nan trabao, nan ta yega trempan pa cumpli cu nan 8 ora, kisas nan no lo bay extra-mile ni kier pone extra empeño, pero nan ta cumpli cu locual nan tin cu haci. Y como directiva di sindicato nos ta purba motiva nan toch y e profesion cu nos ta eherce con cu bay bin ta beneficia no solamente nos como trahado pero full pais Aruba, cu speransa cu cos por drecha den futuro y nos por yega back unda Cuerpo di Aduana tabata 20 aña pasa,” el a finalisa.