Edward Maduro di SADA, tocante indexering: ‘Gasto di personal ta halto, pero ta tuma hende cu contract’

Dialuna atardi na Besturskantor, un grupo di sindicato a haci entrega di dos carta pa Gobierno cu tabata trata tocante indexering y algun tema cu nan ta wardando pa Gobierno por atende cu nan.

Asina a duna di conoce Edward Maduro, presidente di SADA (Sindicato di Aduana di Aruba) tocante indexering, cu gobierno kier duna 5,76 florin na cada ambtenaar di indexering; algo cu a wordo rechasa categoricamente pa e miembronan di sindicatonan mes. Mirando cu na december ultimo nan a manda un carta pa un biaha mas bisa cu nan kier sinta na mesa cu gobierno.

E cifra cu a pone na comienso di negociacion ta pa 150 florin, loke ta ekivalente na 3,6%. Maduro a declara cu e contesta tabata cu gobierno no lo duna mas. “Nan ta sconde tras di e gastonan di personal cu ta halto, pero te cu fin di aña pasa, ainda nan ta tumando hendenan cu contract”,el a sigura.

Tocante esaki, Maduro a resalta cu nan no ta haya ningun propuesta cu ta negociabel, cu por ta mas confiabel riba e acuerdo di 2014. Asina mes el a sigura cu nan no a haya contesta riba e carta cu nan a manda dia 12 di december ultimo.

El a splica cu den e cartanan aki nan ta pidi un reunion lo mas pronto posibel, pero prome cu dia 27 di januari, pa asina nan por papia over di indexering.

Pa locual trata e asuntonan di e otro carta, Maduro a expresa cu nan tin algun tema cu kier atende hunto cu gobierno, cu ta trata di GOA y bashi-premie gelijkbedrag pa esunnan cu a baha cu pension desde 1 di januari di 2015.

Dia 8 di april ultimo, el a recorda cu a informa minister presidente Evelyn Wever-Croes riba e tema aki, cu tabata den su pensamento pa esunnan cu ta baha cu pension mantene e bashi -premie gelijkbedrag. Pero te dia di awe e no a duna un contesta concreto.

Asina mes, Maduro a trece dilanti cu un grupo di pensionado cu a baha despues di 2015 a bay corte, pa motibo cu nan a manda carta pa gobierno pero nan no a haya contesta tampoco. Mirando esey y wardando pa mas di un aña, nan a dicidi di bay corte, cu e resultado cu gobierno mester duna un contesta dentro di tres luna.

Di igual manera, el a finalisa bisando cu nan ta keda discuti e siguiente pasonan, pero ainda no kier ofrece declaracion tocante esey.