Stichting voor Verstandelijk Gehandicapten Aruba lo celebra 55 aniversario cu actividad ‘feria di alegria’. Educador fisico di SVGA, Jean Jarre Kock a menciona e celebracion y con ta preparando pa e evento dia 9 di december.

Kock ta splica cu a bin cu idea pa celebra den un forma di feria di alegria, cu lo ta un dia di deporte recreativo pa nan cliente y muchanan di scol Dun’un man. Nan a acerca Kock hunto cu su colega Puente pa bin cu idea pa weganan.

E ta bisa cu mester tene na cuenta como educador fisico cu cada mucha tin nan calidad y pa e mesun motibo tin cu purba di adapta nan mes na situacion of cada wega na nan nivel.

“Manera den parti di basketball, tin tres diferente cu nan por hunga cune, esun halto, chikito y mas chikito. Esey ta pa demostra cu tin tres diferente manera cu nan por adapta wega pa mucha chikito, mas grandi y esun adulto”, e ta splica.

Nan a adapta tur wega pa asina tur cliente por participa y ningun keda sin celebra conhuntamente cu nan como educador, director general y tur colega di SVGA. Mas di esey, Kock ta bisa cu nan ta contento cu boluntario cu a yuda nan y dos stagiaire di IPA, cu a planifica e wega. Tambe a haya ayudo di Ibisa.

Kock a splica di e reto cu ta confronta como educador. “Si bo splica un mucha cu no tin limitacion ora ta guia, e ta compronde. Den caso di muchanan cu limitacion ta un mundo diferente. E tin su reto.”

E comprension cu un persona cu limitacion of limitacion intelectual ta haci cu ta bira dificil pa un cliente of mucha di e scol compronde e mensahe cu ta purbando di splik’e. Esey ta e comparacion entre nan.

Pa un persona por trata cu persona cu limitacion intelectual of cualkier limitacion, Kock ta expresa cu mester tin ‘hopi curason automaticamente’, cu esey di su mes e pasenshi ta bin. “Si bo tin amor y pasion pa e trabou aki, e ta bin automaticamente. Mi no ta bay bisa cu mester tin pasenshi, pasobra cu curason y pasion e ta yega.”

 

Locual e ta remarca ta cu pa un cliente of alumno por compronde, mester ripiti algun cos. Sinembargo e ta bisa cu el a siña na Hulanda cu ripiticion ta forsa e mensahe cu ta purba pasa na e persona.

Esey ta tuma otro aspecto den consideracion, manera contacto di wowo, manera di splica, no papia mucho lihe. E ta bisa cu mester purba adapta na cada cliente y esey ta pone cu cada biaha, cu tempo, nan ta bay siña cu mester tene cuenta cu e ta bay dura mas tempo pa nan siña. “E ta un trayecto y proceso cu no ta pasa lihe.”

Sinembargo e ta bisa cu e ta bunita cu den transcurso di aña, ta mira un cambio y ta desaroyando. “Bo ta bisa waw cu nan ta scucha bo y nan mes a logra.” Kock ta expresa cu e logro di mas chikito ta nifica un mundo pa nan. “Ami ta kere cu nos como persona ta sinta pensa un rato. E muchanan aki cu tin algun dificultad di siña of limitacion, pa nan un logro ta pa celebra, anto esey ta bunita pa maak mee.”

Kock ta comparti cu pa wak un persona cu deficiencia intelectual cu tin pasion pa yega asina leu, e ta duna e persona un satisfaccion. E persona cu limitacion ta duna cambio y ta agradecido pa e amor cu nan ta haya di persona manera e, kende ta educador fisico.

“E amor y danki cu bo ta haya di nan ta asina real, cu no ta hay’e otro caminda. Nan ta sinti bo. E no ta locual e ta mustra, sino locual ta conta pa nan ta locual bo ta duna; anto esey bo ta haya bek y nan ta sinti bo di curason”, e ta bisa.

Kock ta bisa cu e ta kere cu pueblo di Aruba por yuda nan door di compronde kico ta mensahe cu nan kier trece dilanti. Nan ta agradecido pa tur esunnan cu a duna aporte y ta envolvi den cierto manera pa haci e feria un exito.