Fundado y presidente di Aruba Marine Mammal Foundation Angiolina Henriquez kende tin casi 10 aña ta traha den e fundacion ta expresa cu: “nos ta haya nos mes cu tur e desafionan cu tur pais rond mundo ta anda cu nan, pero cu menos recurso.”
Na 1998 ora sra. Henriquez a muda bin biba na Aruba, el a haya su mes enfrenta cu un situacion unda tabatin un dolfijn malo dilanti cas den lama. E tempo ey, sra. Henriquez ta splica cu ‘no tabatin instancia pa interveni cu e publico cu tabata molestia e dolfijn. E tabata un situacion basta serio, asina aki mi a dicidi cu mi mester a haci algo.’
Segun sra. Henriquez, despues di esaki el a sigui wordo yama ora cu e bayenanan ta mucho cerca di canto di lama of otro situacion cu dolfijn of bayena. “Ta asina aki cu awendia e fundacion ta e coordinador oficial riba Aruba ora cu tin contacto cu dolfijn of bayena cu kier acerca e costa”
Trabou di e fundacion
Sra. Henriquez ta splica cu nan trabou como fundacion ta encera oficialmente proteccion pa conservacion di bayena y dolfijn salvahe den nos awanan, como tambe conscientisacion, educacion y research. E fundacion ta colecta informacion pa forma un database di loke tin den e lama rond di Aruba.
Den e parti di research, sra. Henriquez ta splica cu nan a cuminsa pa colecta informacion ora personanan riba lama ta topa cu dolfijn of bayena cerca di nos costa. “Aparte di esaki nos tambe ta colecciona e animal morto cu wordo haya pa nos mand’e afo unda cu nan ta haci estudio riba e curpa. Un ehempel ta ora nos a haya e 4 buddha whale. Nos a haci un estudio cientifico ora a analisa e DNA di su cabes y publica esaki.”
Colaboracion den region
Segun sra. Henriquez, conhuntamente cu Venezuela, e fundacion a cuminsa cu un iniciativa pa haya instancianan y cientificonan den region pa pone nan database hunto. Sra. Henriquez ta splica cu ‘ora ta trata di dolfijn cu bayena, ta trata di especie cu ta migratorio. Ora cu nos a cuminsa cu e proyecto aki, tur informacion tabata fragmenta.’
Un otro proyecto cu sra. Henriquez ta describi ta uno cu ta wordo haci conhuntamente cu National Oceanic and Atmospheric Administration di Merca. Actualmente nan ta ‘poniendo aparatonan pa graba bayenanan specifico, manera e humpback whale.’
“Nos ta uza e aparatonan ki, cual ta di Cornell University, pa graba e canto di e bayena masculino. Tur aña e bayena masculino ta cambia nan canto pa asina atrae e bayenanan femenino. Nos ta spera cu nos por sigui haci e research cientifico aki.”
Desafionan
E fundacion ta haya su mes enfrenta cu desafionan cu na nivel mundial tur pais ta lidia cu nan, segun sra. Henriquez. “E unico diferencia ta cu na Aruba nos ta mas chikito”
Un di e menasanan mas grandi pa e bestianan aki, ta e reglamentacion di piscamento. “Varios biaha nos a yega di haya un sperm whale, cual ta den peliger di extincion, morto pega den un net cu a wordo laga atras pa piscadonan”, e ta bisa.
Sra. Henriquez ta expresa cu e departamento di pesca ta causa hopi morto sin necesidad.
Redaccion di Bon Dia Aruba lo purba haya un reaccion di e departamento Santa Rosa y lo reporta riba esaki den un proximo edicion. Un fenomeno cu sigur ta un problema globalmente y cu Aruba tambe sa wak ta polucion di e ocean, sea kimico of di sushi, segun sra. Henriquez.
“Nos ta na altura cu ora di derame di azeta e lama ta wordo gespuit cu un kimico cu no ta yuda en berdad, ya cu e ta djis sconde e azeta. Esaki ta dañino pa e bida marino.”
E polucion di plastic tambe ta causa hopi daño na e bida marino, segun sra. Henriquez. “Nos a yega di haci autopsia riba dolfijn y ora nos a habri e bariga nos a haya e stoma yena di tur tipo di plastic.”
Ultimamente tambe cu e instalacion di e zona di transshipment, sra. Henriquez ta splica cu esaki por stroba e sobrevivencia di e bestianan. “Tanten cu e botonan no move e no ta problema, pero ora nan ta nabega e polucion di zonido ta percura pa nan no bin cerca na e costa”, e presidente di e fundacion ta comenta.
Segun sra. Henriquez, e bayenanan y dolfijnnan mester por yega na e costa pa por duna luz y pa por recupera di nan heridanan. “E Orca cual ta un enemigo natural di e bestianan aki tambe ta existi den Caribe. Ora cu nan ta den peliger nan ta drenta costa di Palm Beach, Malmok y Arashi.”
Posibel mehoracion den e situacion
Sra. Henriquez ta splica cu nan ta purbando di bin cu un programa educativo riba internet cu por conscientisa e poblacion con pa anda miho cu medio ambiente. “Nos ta parti flyernan na scolnan y instancianan cu ta subi lama. E aña aki nos ta ocupa pa bay bek na e hendenan y ta hopi mas activo den e aspecto educativo.” E ta subraya cu Aruba ta e unico den e area unda cu bayenanan y dolfijnnan ta uza e costa como refugio. “Nos tin un posicion unico den e zona y nos mester ta consciente di esaki.”
Kustwacht ta un di e partnernan di e fundacion, segun sra. Henriquez. “Ora cu tin incidente nan ta yuda nos mantene ordo.” Pero e ta splica cu ‘mester bin cu un legislacion of un “Gentleman’s Agreement” pa cierto area wordo reconoci como “Marine Mammal Sanctuaries” oficialmente.
Sra. Henriquez a finalisa bisando cu “mi ta kere firmemente den un piramid unda e base ta educacion di e populacion, un bon legislacion of regla y ariba un control y supervision sigura.”
