Durante un conferencia di prensa cu Eduardo de Veer, Presidente di MetaCorp a haci diaranson pasa hunto cu e directiva di e compania pa celebra nan di 100 aña, el a papia tocante e ley di compania Serlimar y a pidi pa stop polemica den asunto aki.

De Veer a splica cu el a combersa cu minister di Infrastructura, Desaroyo Teritorial y Medio Ambiente, Otmar Oduber y el a declara cu lo sali for di politica pa motibo cu mester cuida su salud. Tocante esaki tambe a referi cu loke e kier ta ‘stop e polemica’ y laga Oduber retira trankilo, pa motibo cu e no ta bay responde riba locual a wordo bisa dialuna 18 di november durante un conferencia di prensa di Gobierno.

Di mesun manera, el a bisa cu ta pone nan reputacion pa comunidad y a pidi pa baha e polemica, pa motibo cu nan no kier duna ‘fuel’ na un polemica innecesario.

Tambe a expresa cu diamars nan a tene un reunion cu gerencia di Serlimar, cual el a sigura cu a bay masha bon y e motibo di e reunion tabata pa busca solucion pa e problemanan cu ta wordo vocifera door di comunidad. “Mi ta kere cu nos tin un solucion rapido, efectivo y duradero”, el a sigura.

De Veer a resalta cu nan ta contra e propuesta di ley, pa motibo cu si e ley lo a pasa manera cu el a wordo skirbi, esey tabata e final di EcoGas y EcoTech. Hopi experto a bisa cu no por, e ta un debate politico y si ta existi un solucion cu nan por alcansa cu e mesun obhetivo cu Gobierno tin pa resolve e problema di dump y desperdicio, nan por resolve hunto. “Pakico nos ta bay bringa pa gasta tanto placa na pelea, ora cu nos por dedica esfuersonan ey pa yega na un solucion?”, De Veer a señala.

Tocante ‘envirobales’ cu ta uza na diferente pais, De Veer a bisa cu nan no ta sushi. E ta algo cu ta sali di e sushi, pero despues cu ta saca varios cos den dje, manera piedra, santo, glas, awa, carton, metal, aluminium, hero y desperdicio organico, loke ta resta ta loke ta yama ‘refuse derived fuel (RDF)’, di cual nan a yega di manda un miyon tonelada pa Dinamarca añanan pasa.

E material aki, tin un balor calorifico di mas di 4.500 kilo calorico, cu ta wordo uza na luga di carbon y cada tonelada di esaki ta un tonelada di carbon menos cu mester wordo mina den tera y esey ta baha e ‘carbon footprint’, cu henter mundo ta buscando di baha.

Tambe el a informa cu a caba di haya un ‘Letter of Comfort’ di compania Argos, den cual a declara cu nan ta dispuesto pa drenta den un contract di largo duracion pa exportacion di RDF, cu lo uza pa reemplasa carbon.

Ademas De Veer a declara cu 80% di e desperdicio di Aruba ta yega na EcoGas y eynan e ta wordo procesa y ta separa locual por exporta – manera aluminium y ora nan ta saca piedra cu santo – esey por wordo uza pa fundeshi of otro cos, depende di e calidad di concreto.

Pa finalisa, De Veer a informa cu e contract actual cu nan tin cu Serlimar ta cu pa tonelada di desperdicio ta 180 florin.