Desde cu ASTEC a bin cu e reglamento di rista hopi disgusto a bin dilanti di parti e duaneronan cu ta traha na waf di Barcadera. E duaneronan ta puntra nan mes con ta posibel cu un compania priva lo mester rista nan asina cu yega waf ya cu nan no tin e autoridad pa haci esaki. Nan kier mira un solucion pa cu esaki pa asina nan por sigui traha trankil. Tin un sistema di swipe na e entradanan na Barcadera, pero esaki no ta den completo funcion. Sr. Eduard Maduro, presidente di sindicato SADA, a indica cu nan no tin problema pa swipe nan.
A puntra sr. Maduro dicon no tin e sistema di swipe carchi/badge na waf di Barcadera, ya cu na aeropuerto tur hende cu ta traha eynan mester swipe nan badge pa asina nan por habri e portanan pa por bay paden y pa por haci nan trabou. Segun e sindicalista, ASTEC a bin cu e sistema aki pero esaki no ta den funcion completo ainda. El a compronde cu tin problema cu e aparato cu a wordo pidi. ASTEC a pone e mashinnan aki na tur e entradanan, pero no ta na tur caminda e sistema di swipe no ta traha.
Swipe carchi
“Pero no ta esey solamente. Nos no tin problema cu esey. Nos no tin problema pa swipe,” el a bisa Bon Dia Aruba. Pa nan e problema ta cu ora bay over na rista un duanero ambtenaar, nan no por yega rista e duanero. “Eynan ta caminda cu mi ta kere cu esunnan encarga mester bay wak con nan ta bay actua cu e situacion. Mi ta kere no ta na su luga cu bo ta laga un compania priva cu no tin niun tipo di autoridad pa haci cierto cosnan contra cuerponan di duana, polis, inmigracion y warda costa.”
