Siman pasa un mayor a ricibi un noticia cu sigur ningun mayor kier scucha den su bida. Su yiu homber di dos aña a wordo diagnostica cu cancer. Cantidad di hende cu e no ni conoce a bin dilanti e fin di siman aki pa yuda cu donacion pa e por bay hunto cu su yiu Hulanda, cual e tata ta sumamente gradicido di dje.
E tata Edmar Winterdaal a comparti riba su pagina di Facebook e fin di siman aki un storia cu a captiva comunidad di Aruba. E ta conta cu su yiu di dos aña Sheydon Hose tabata bira malo ultimo tempo cu keintura halto y basta frecuente. Cada bes cu nan a hiba e mucha dokter, segun e ta sigui declara, e dokternan ta prescribi Paracetamol y ta manda e mucha cas sin pidi pa un specialista. Ultimo siman e mayor a ripara cu e barika di su yiu a cuminsa blaas anto porfin a laga e mucha bay un specialista.
‘Wilms tumor’
E resultado di bishita na specialista a constata cu e Sheydon tin un tumor di 12 centimeter den su riñon. Conoci como e Wilm’s Tumor. Esaki ta un tipo di cancer den riñon cu ta mas comun den muchanan y no mesun hopi pa adultonan. E tata a kita for di trabao pa bay bringa esaki na Hulanda cu su yiu. Mañan nan ta biaha bay Hulanda despues cu a pidi comunidad di Aruba pa aporta cu algo pa yuda e tata yega na su pasashi y cubri su gastonan pa e por bay cu e mucha. Cu lagrima na su wowo, sr. Winterdaal a gradici tur hende cu a bini hunto pa yuda cu e situacion hopi fastioso aki cu nan ta aden. Via un video di Facebook Live e ta bisa: “Pa mi yiu mi lo move shelo y tera. Esaki ta e miho manera pa mi comunica cu boso tur y mi ta gradici boso un mundo pa boso apoyo.”
Paracetamol
Un di e cosnan cu seguramente ta trahando duro riba sr. Winterdaal ta e echo cu e dokter a keda manda e mucha cas cu Paracetamol den e prome simannan cu a cuminsa ripara cu algo no tabata bon. “Nos a keda pidi pa cuido special di specialista. Despues cu porfin e dokter a laga nos bay un specialista, a bin dilanti cu Sheydon tin un tumor di 12cm den su parti abdominal.”
Donacion y gradicimento
Sr. Winterdaal a tuma e fin di siman aki pa e bay entre otro na Linear Park pa tuma donacion di hende y Kapel Alto Vista pa haci oracion. E ta bay ta na Linear Park 7:30 awenochi atrobe pa ricibi cualkier donacion.”Danki guys, danki. Un cambio mester pasa, un cambio ta bay bin den nomber di amor. Mi no ta bay para asina wak na banda. Ami ta bay habri mi boca pasobra mi sa cu hopi hende no tin e conocemento con pa move y e ta un bataya hopi duro. Pa para bo mes riba pia y expresa bo mes no ta facil. No ta facil pa saca dolor di famia pero nos ta bay dilanti,” sr. Winterdaal a expresa cu hopi emocion. E tata kier bin cu un movimiento yama ‘Celebra Bida’. E ta indica di no sa ainda completamente con e ta bay haci esaki, pero e kier traha un movimiento pa yuda famianan cu ta pasa den e mesun tipo di casonan aki. Ya caba ta conta cu apoyo di artistanan local manera Jeon, Janiro Eisden, Zyon y hopi otro hende mas cu ta apoyando e causa aki.
