200 artista local hunto riba un solo anochi

Riba nos dia nacional diasabra 18 di maart, cantante local Edjean Semeleer ta bay presenta un concierto historico y monumental na e teatro di Ser’i Noka. Presenta na honor di nos Dia di Himno y Bandera, Edjean cu su orkesta estelar y su amigonan musical lo uni pa canta pa nos Aruba. No menos cu 200 cantante ta bay bini hunto riba e dia aki den loke Edjean ta bisa di ta e evento di mas special cu e ta organisa te aworaki den su bida.

“Pa mi e ta hopi importante cu artistanan local di diferente backround por bini hunto y logra cosnan positivo pa nos mes, pero tambe pa esunnan cu nos ta influencia,” Edjean Semeleer ta bisa Bon Dia Aruba. Den un entrevista pa combersa un poco riba e idea tras di e concierto aki, Edjean ta conta nos cu pa tur e artistanan e compromiso ta hopi cla: nan intencion no ta djis pa solamente presenta un show.  “Nos kier purba inspira y pone e publico tambe pensa mas leu cu si nan traha tur dia nan tambe por logra nan metanan enbes di djis keda pensa riba dje. ”

7 aña tras di Ser’i Noka
E idea di bay na Ser’i Noka segun Edjean ta pasobra esaki ta un luga cu tin hopi aña sin wordo uza pa un espectaculo manera esun cu e ta bay haci. “E localidad tin decadanan sin wordo uza mes pa produccionnan artistico. Mi a ripara e reaccion despues di e anuncio di e concierto pasobra den menos di un siman ya nos a bende tur e carchinan. Mi ta kere e localidad a hunga un rol pasobra e ta algo diferente, un teatro den aire liber,” Edjean ta splica Bon Dia Aruba.  Edjean ta bisa cu e tin 7 aña purbando di organisa algo na  Ser’i Noka. Despues di 7 aña porfin el a haya e ok for di e fundacion cu ta percura pa cuida e luga aki den un manera hopi estricto.  E ta un luga religioso y nan no kier pa e luga bay perdi of ken cu ta bin haci algo eynan. “Mi ta contento cu nan a acepta pa e proyecto aki bay eyden. Esaki ta un proyecto cu nan a compronde cu e  ta algo cu lo inspira asina hopi hende y trece algo positivo den e bida di tur dia na Aruba.” E concierto aki ta pa inspira y mustra cu Aruba por mira su artistanan, cu por cierto no ta solamente hendenan cu a nace na Aruba, pero hendenan cu ta biba na Aruba, cu ta parti di nos comunidad y ta traha duro pa hiba nan mes, nan famia y pais dilanti. Lastimamente no tin mas carchi obtenibel pero segun Edjean nan lo percura pa esaki wordo transmiti en bibo pa esunnan cu no lo ta presente.

200 cantante
E idea tras di bini cu mas cu 200 cantante pa e concierto aki, ta pa demostra cu artistanan na Aruba por uni a pesar di diferencianan di opinion y a pesar cu egonan por clash cu otro. Edjean ta bisa: “Ta yega cierto momento cu nos mester bini hunto pa mustra cu toch na Aruba nos mester mas union. Pa nos biba mas cu otro y tene man di otro pa bay dilanti.” Esaki ta prome biaha cu Edjean ta organisa un evento cu lo tin e cantidad di cantante asina.  “Mi a yega di haci produccionnan mas grandi manera un Convention Center unda bo ta papiando cu un publico di casi 2.000 hende, cu gastonan mas halto cu Ser’i Noka. Pero mi ta kere esaki ta e produccion di mas special cu mi ta organisa si.”  Algun di e artistanan cu lo presenta ta entre otro Alydia Wever, Janiro Eisden,  Jeanedy Semeleer, Sushaira Kerpens,  Galloway Jr. , Jersey Sophia.