Microsoft ta uniendo editornan Europeo pa pusha pa un sistema pa forsa plataformanan tecnologico grandi pa paga pa noticia, aumentando e apuesta den e bataya lidera pa Australia pa forsa Google y Facebook paga pa periodismo.
E gigante tecnologico di Seattle y cuatro grupo di industria noticiero di Union Europeo a revela nan plan ayera pa traha hunto riba un solucion pa ‘obliga paga’ pa uso di contenido noticiero di ‘gatekeepers’ online ‘cu poder di mercado dominante’.
Nan a bisa cu nan ta bay ‘tuma inspiracion’ di legislacion proponi na Australia pa forsa plataformanan tecnologico comparti ganashi cu companianan di noticia, y cu ta inclui un sistema di arbitrahe pa resolve disputa tocante un prijs husto pa noticia.
Facebook siman pasa a blokea Australianonan di haya acceso y comparti noticia riba su plataforma, den respuesta na e propuestanan di gobierno, pero e movida sorpresa a ricibi critica publicamente y a intensifica e debate riba con hopi poder e red social tin. Google, mientras tanto, a tuma un tactica diferente door di cera acuerdonan di pago cu organisacionnan noticiero, despues di hala atras su menasa inicial di elimina acceso di Australianonan na su motor di buskeda.
Comisionado di mercado interno di UE, Thierry Breton, a expresa sosten pa Australia den e señal mas recien cu e movida di Facebook a fracasa. “Mi ta kere ta hopi lamentabel cu un plataforma ta tuma decisionnan asina pa protesta contra leynan di un pais”, Breton a bisa legisladornan di UE. “Ta keda na e plataformanan pa adapta na reguladornan”, el a bisa, agregando cu loke ta pasando na Australia ‘ta resalta un actitud cu mester cambia’. Breton ta liderando e reforma amplio di regulacion digital na UE cu meta di controla e poder di companianan ‘Big Tech’, memey di preocupacion cu nan aligoritmo ta socavando democracia.
Microsoft ta uniendo forsa cu dos grupo di interes, e Conseho di Editor Europeo y News Media Europe, hunto cu dos grupo representando editornan di corant y revista Europeo, cu ta conta pa miles di titulo. E compania a expresa sosten pa e plan di Australia, cu por yuda aumenta e share den mercado di buskeda online pa su motor di buskeda, Bing.
Paisnan di Union Europeo ta trahando pa adopta, pa juni, reglanan di copyright (derecho di autor) remodela prepara pa ehecutivo di UE cu ta permiti compania- y editornan di noticia pa negocia pago di plataformanan digital pa uso online di nan contenido.
Pero tin preocupacion tocante un desbalance di poder di negociacion entre e dos banda, y e grupo a pidi pa añadi medidanan nobo na e remodelacion proximo di regulacionnan digital pa adresa e problema.
Editornan ‘por no tin e fortalesa economico pa negocia acuerdonan husto y balansa cu e companianan tecnologico ‘gatekeeper’ aki, cu tambe por menasa di cana bay di negociacion of bandona un mercado completamente’, e grupo a bisa den un declaracion conhunto. Google y Facebook a resisti arbitrahe pasobra lo duna nan menos control riba negociacion di pago.
Facebook no a responde na un solicitud pa comentario. Google a bisa cu ya a firma centenares di acuerdo cu editornan noticiero na Europa, haciendo e un di e fundadonan mas grandi di periodismo, y a nota riba Twitter cu ta trahando cu editornan y legisladonan na EU mientras paisnan miembro ta adopta e reglanan di copyright den legislacion nacional.
