A tarda 6 aña pa finalmente por a logra termina e proyecto di renobacion di e edificio monumental Uncle Louis Store den pleno curason di San Nicolas.
Ayera a tuma e traspaso di e yabi for di compania di construccion Van Havenbouw N.V pa directora di Stichting Monumentenfonds Aruba (SMFA), Anne Witsenburg. Igualmente Sra. Witsenburg a traspasa e yabi na Lands Aruba pa medio di minister di Infrastructura, Marisol Lopez-Tromp kende finalmente a entrega e yabi na e director di departamento di Naturalesa y Medio Ambiente (DNM), ya cu for di ayera e edificio monumental y moderno aki ta bira nan sede nobo.
SMFA a logra bira realidad e proyecto aki cu ayudo financiero di RBC Bank. E ta un joya arkitectonico monumental, pero tambe el a bira awor un edificio innovativo y te hasta sostenibel. E tin panel solar y sistema pa recicla awa. Nan a tene cuenta pa verf cu color di naturalesa y nan a uza palo tambe. E vloer ta color tera. E lo wordo dorna cu cosnan di arte riba naturalesa y medio ambiente.
E ta un edificio yen di historia rond di e personahe central di Leon Waitzberg conoci como “Uncle Louis”. Directora di SMFA a bisa cu loke ta haci un edificio monumental no ta su arkitectura so, sino su historia tras di dje. El a recorda cu nan a cuminsa compila informacion historico tocante e edificio aki a base di un articulo cu e editor di Aruba Today, Linda Reijnders a skirbi e tempo aya pa e corant Amigoe. Despues e Museologo Lili Peterson a sigui cu e tarea aki. Witsenburg a bisa cu ‘Uncle Louis’ a laga un historia na San Nicolas y p’esey su nomber a keda den edificio aki.
Sra. Witsenburg a gradici tur hende cu a duna su aporte pa e renobacion di edificio aki por a bira un realidad. “Nos ta cla pa un futuro nobo”, el a bisa
Di su banda, minister Lopez-Tromp a bisa cu pa gobierno cu a huur e edificio aki a bira un desafio pa crea desaroyo economico, specialmente na San Nicolas, pero tambe manteniendo conservacion di medio ambiente. Pues pa mantene e balans ey, nan tin tur dia su desafio. P’esey nan ta considera e presencia di DNM uno masha importante den e tarea aki. Pero tambe un tarea importante den e tuma di decision pa loke ta ROP (Ontwikkelingsplan) tambe.
