(AP) — Servicionan di emergencia na Liberia tabata combati un candela na e edificio di parlamento ayera, cu a surgi mientras cu manifestacionnan di oposicion a continua pa un di dos dia.
Autoridadnan no a confirma di inmediato e causa di e candela den e capital, Monrovia. Presidente Joseph Boakai, ken a bishita e sitio y a ordena un investigacion di e incidente, a condena e “destruccion innecesario den e pais.”
E protestanan ta ser organisa contra movidanan pa kita e presidente di parlamento, ken ta enfrenta acusacionnan di corupcion. E manifestantenan tambe ta pidi pa e presidente renuncia.
Diamars polis a detene decenas di manifestante y a usa gas lacrimogeno pa plama nan.
Esaki ta e di dos biaha den un siman cu e edificio di parlamento ta pega candela, aunke no tin indicacion cu e incidentenan ta conecta. Reporteronan local ta bisa cu polis a detene algun sospechosonan cu tabata den e area ora cu e ultimo candela a cuminsa.
E protestanan a surgi despues di lunanan di tension riba si Konati Koffa, presidente di e Cas di Representantenan di Liberia y ken ta un miembro di partido di oposicion, lo ser kita di su puesto pa supuesto practicanan corupto.
E ley di Liberia ta stipula cu e presidente por ser kita pa un mayoria di dos tercera parti di e Cas. Pero sin e sosten necesario pa esey, e parlamento ta ser blokea y e gobierno no a por aproba e presupuesto anual.
