Algun dia atras reportero di Bon Dia Aruba a tuma nota di un publicacion ariba e red social Facebook, na unda un usuario a publica un serie di potret di e edificio cu antes tabata Reina Beatrix School na playa. Un publicacion cu a yama atencion y cu a wordo comparti algun biaha pa diferente otro usuario.
Den e serie di potretnan aki, e usuario en cuestion, a mustra con deteriora e edificio aki ta tanto di paden y pafo. Potretnan cu a trece hopi sentimento di tristesa pa otro usuarionan, ex-alumnonan di e scol y cu a expresa nan opinion den e comentarionan.
“Hopi jammer…ta haci dolor pa wak e school den e estado aki,” un usuario a comenta. Mientras cu otro a puntra ta pakico a bandona e edificio aki y lag’e deteriora di tal forma. Otro a indica cu ta algo “masha tristo mes pa mira e edificio di ‘nos’ scol asina” y asina hopi otro tabata sorprendi di con atras e ex-school aki a bay sin cu ningun instancia a interveni te na e momentonan aki.
Otro usuario a comenta cu e scol a bira un monumento algun aña pasa, pero cu “ni gobierno ni monumentenfonds a haci net net nada pa drecha e scol!”
Un realidad tristo cu ainda no tin un solucion p’e. Ademas, no solamente e edificio aki ta den un estado asina deplorabel; e edificio na banda, ex-Juliana School Mavo, tambe ta den e mesun situacion di deterioracion.
