En conexion cu formacion di un gabinete nobo, Gobernador di Aruba Su Excelencia Alfonso Boekhoudt, durante di e siman tras di lomba a hiba varios ronda di consulta cu conseheronan y cu lider di e partidonan politico cu durante e eleccion di 25 di juni ultimo a haya un of mas asiento den Parlamento di Aruba.
Siguiendo e consultanan aki, riba dialuna 5 di juli Gobernador a nombra señor Eddy Werleman y señora Tisa LaSorte como informador. A pidi nan pa averigua cua posibilidad tin pa formacion di un gabinete stabiel cu tin confiansa di un mayoria mas amplio posibel den Parlamento. E gabinete mester por yega na un maneho conhunto, dirigi riba recuperacion financiero y socialeconomico di Aruba, particularmente riba implementacion y realisacion di e Landspakket Aruba. Ta importante pa e gabinete por cuminsa traha mas pronto cu ta posibel riba un cantidad di asunto urgente.
Si resulta cu por forma tal gabinete, e informadornan mester motiva e partidonan politico envolvi pa firma un declaracion di boluntad (‘bereidwilligheidsverklaring’). Den e documento aki e partidonan ta declara cu nan ta dispuesto pa conhuntamente forma un gobierno di coalicion.
Señor Werleman y señora LaSorte a acepta e encargo di informacion aki. Pa mas tarda 12 di juli 2021 e informadornan mester informa Gobernador por escrito tocante e resultado di e encargo.
