ORANJESTAD – Edad di pension lo bira un tema cu lo wordo trata den e dialogo tripartite social laboral, cu gobierno (MEP-POR-RED) lo start otro siman.

“Edad di pension ta un di e temanan cu sigur lo wordo hiba,” minister Glenbert Croes a bisa. El a laga sa cu minister president, Evelyn Wever-Croes tambe ta trahando riba e tema ey.

Sinembargo, minister di labor a indica cu nan tin hopi asunto pa atende durante e dialogo aki. El a aclaria cu ta depende di e participantenan pa determina e prioridad di cada tema. Finalmente, den plenario nan ta bay dicidi e nivel di prioridad di cada un di nan.

E ta kere cu e dialogo tripartite aki lo ta un bon escenario pa dicidi kico nan ta kere como pais cu mester ta e edad di pension. Pero tambe defini algo cu lo ta financieramente cargabel, pa tuma un decision responsabel y factibel pa nan por logra tambe meta di campaña politico.

Bahamento di edad di pension ta un asunto cu e mesun partido cu minister ta forma parti di dje (MEP), a haci campaña cune. Te hasta e mandatario aki a yega di priminti di baha edad di pension di 65 aña, y lag’e temporalmente na 62 aña, te ora un decision riba e asunto aki por cay.

E mandatario a reconoce cu e ta un persona emocional, y esaki no ta kita cu eventualmente el a trece algo dilanti di un forma prematuro, sin evalua prome. Un di nan tin di haber ora el a promove un aumento di salario substancial.

E ta haya cu edad di pension ta un derecho fundamental di un ciudadano. Pero mester trat’e cu cabes friu, y di forma responsabel. Ya sea cu edad di pension ta keda 65 aña, manera a wordo fiha den e dialogo social cu a tuma luga durante e gobierno anterior. Of si edad di pension mester baha, mester determina e forma con esaki lo tuma sosode.

“Nos mester por haya un solucion, unda cu tur hende por carga e necesidad cu como comunidad y futuro pensionado lo kier mira,” el a bisa.

Gobierno anterior a scoge pa hisa edad di pension te 65 aña, pa duna Banco di Seguro Social (SVb) mas espacio. Pero si gobierno lo dicidi di cumpli cu su promesa electoral di baha edad di pension, y si situacion financiero di pais Aruba ta bon den su presupuesto, nan lo por aporta mas den e fondo aki pa dun’e e solides financiero, pa baha edad di pensioen. Pero el a laga sa cu esaki ta gewoon un teoria, ya cu si finansa di pais Aruba ta den e situacion precario actual, ‘e ta mara bo man.’

El a indica cu SVb ta e instituto cu ta maneha e fondo di pension, pero gobierno mester percura pa e fondo aki. Den caso cu nan kier baha edad di pension, pero e fondo aki su situacion financiero no ta suficiente pa paga e pension te cierto edad, nan mester evalua esaki.

Croes a bisa cu e trayecto cu ta tumando luga den henter mundo ta mustra cu edad di pension ta aumenta keto bay. E ta haya algo husto cu si un persona ta paga prima pa bo por haya un pension, cu bo tin derecho no solamente di cobr’e, pero tambe disfruta di dje.