Mañan pueblo Ecuatoriano bibando paden y pafo di nan pais natal lo bay vota pa eligi un presidente nobo pa reemplasa e mandatario actual, Lenín Moreno. Na Aruba e comunidad chikito di Ecuatorianonan no lo participa den e eleccion aki.

Un total di 13 miyon di Ecuatoriano tin derecho di deposita nan voto den e prome eleccion di 2021 celebra na America Latina y Caribe den tempo di pandemia y crisis economico.

Un total di 16 candidato ta participa den eleccion aki. Entre e candidatonan mas faborito pa gana e eleccion aki ta wordo destaca Andrés Arauz, kende ta lider di e plataforma Union pa Esperanza. E ta un plataforma politico cu ta conta cu apoyo di ex presidente Rafael Correa.

E di dos candidato faborito ta e conservador y lider di Movemento CREO, Guillermo Lasso. E ta un politico veterano kende a yega di fungi como ministro di Economia durante e crisis financiero di 1999.

Si mañan niun di e 16 candidatonan no ta logra e mayoria absoluto, kiermen un 40% di e votonan valido of un diferencia di 10% di voto for di e di dos candidato mas voto, lo bay tin un segunda buelta electoral dia 11 di april awor. Den e di dos buelta aki lo participa e dos candidatonan cu a logra e mayoria di voto diadomingo awor.

Aruba

Bon Dia Aruba a tuma contacto cu Consul honorario di Ecuador na Aruba, Magali Guzman kende pa medio di un comunicado a expresa cu mañan nan lo eligi presidente, vice presidente y congresista.

Tambe el a referi cu actualmente e cantidad di ciudadano Ecuatoriano cu a registra Aruba como nan domicilio electoral ta minimo, posiblemente debi cu e cambio di domicilio electoral no ta obligatorio na Ecuador. Esaki ta e motibo cu Aruba y otro islanan di Caribe no tin centro electoral mañan. E ciudadanonan aki ainda ta aparece registra den e localidad ultimo prome cu nan a bay biba den exterior. E diplomatico a informa na e matutino aki cu alrededor di 250 pa 300 Ecuatoriano ta residencia na Aruba.

El a laga sa cu ta importante pa tur ciudadano bibando den exterior mester a actualisa nan domicilio nobo pa asina nan por eherce nan derecho di voto den nan pais di residencia nobo. Unabes cu nan ta registra den e pais unda nan ta biba actualmente, autoridad electoral di Ecuador lo procede pa instala mesanan di votacion.

Consul di Ecuador na Aruba, Magali Guzman ta haci un yamado na tur nan conciudadanonan pa actualisa nan domicilio electoral. Pa asina den futuro e comunidad Ecuatoriano riba nos isla lo por participa activamente den eleccionnan venidero.

Actualmente autoridad electoral di Ecuador a instala 936 mesa di votacion den e paisnan unda tin mayoria di migrante Ecuatoriano manera Merca, Spaña, Italia, Francia y Suecia. Mientras paisnan manera Peru y Panama a bin cu restriccion, y nan comunidad Ecuatoriano no por vota pa causa di e pandemia di Covid-19.