(EFE) – Polisnan di Ecuador y Spaña ayera diamars a duna un golpi na mafia Albanes cu un operativo conhunto den cual a detene 30 persona pa nan presunto vinculo di mandamento di cantidad grandi di cocaina pa Sur America y Europa y labamento di placa di por lo menos 32 miyon dollar.
Entre e detenidonan di e operacion denomina “Pampa” tin 18 persona na Ecuador y 12 na Spaña di nacionalidad Ecuatoriano, Spaño, Argentino, Colombiano, Albanes y Chines, cu ta involucra den por lo menos 11 operacion pa manda pa Europa cargamento di cocaina produci na Valle del Cauca (Colombia) a traves di container di banana na wafnan di Ecuador.
E operativo, producto di un investigacion di dos aña y mey, a implica e participacion di cerca di 750 agente di Polis, 400 di nan na Ecuador y 350 na Spaña pa realisa e registro di 42 propiedad, di nan 33 na teritorio Ecuatoriano y 9 na teritorio Spaño, na ciudadnan manera Barcelona, Malaga y Valencia.
Eynan a confisca un total di 22 auto, 8 arma di candela, 27 telefon celular y 10 dispositivo electronico, asina como 500.000 euro na Spaña y un cantidad di dollarnan na Ecuador cu te ainda mester ser determina.
Como parti di investigacion a logra confisca primeramente na Ecuador y na varios pais di Europa un total di 2.3 ton di cocaina.
Di acuerdo cu Polis Ecuatoriano, e lider di e organisacion aki ta e Albanes, Dritan Gjika, ken tabatin vinculo cu e empresario Ecuatoriano Ruben Cherres, cu aña pasa a ser asesina despues cu den un investigacion penal cu a revela cu e tabatin relacion cu e presunto narcotraficante.
Cherres tambe tabata implica den e red di corupcion den empresanan publico cu tabatin como aparente lider su amigo Danilo Carrera, sua di e presidente na e momento ey, Guillermo Lasso, un caso cu a causa e huicio politico di e mandatario na Asamblea.
Den un conferencia di prensa, director antidroga di Polis Nacional di Ecuador, Willian Villaroel, a señala cu Gjika y Cherres tabata socio di varios compania constructor den cual te momentonan aki no tin pruebanan cu ta participa den e mandamento di droga.
Villaroel a detaya cu e organisacion tabatin seis compania na Ecuador y cuatro na Spaña “cu un actividad comercial grandi cu tabata facilita e labamento di placa” y na unda tabata comercialisa e cargamento di banana unda e droga tabata biaha scondi.
Segun investigacionnan policial, e Albanes Gjika, cu no ta entre e personanan deteni, tabata realisa e pedidonan di droga na laboratorionan productor di cocaina na Colombia y tabata coordina e benta di e mercancia na Europa.
