(France24) – Proximo 21 di april Ecuador ta bay dicidi si kier sigui e caminda di Daniel Noboa y ta bay vota den un referendum pa reforma cinco punto clave di Constitucion.

Entre e temanan cu ta bay vota ta e participacion di Forsa Arma den apoyo na Polis contra crimen organisa, permiti extradicion di Ecuatorianonan, implementa husgadonan den materia constitucional, reconoce arbitrahe institucional y flexibilisa mercado laboral cu contractnan temporal y pa oranan.

Noboa, cu tin e bandera di lucha contra gruponan di crimen organisa, a yega na poder na november 2023 y na januari a declara estado di excepcion despues cu a cuminsa un ola di violencia den prisonnan. E scenario aki a duna luga na decreto di “conflicto arma interno,” cu e cual a cuminsa considera 22 grupo criminal como “teroristanan” y a permiti e participacion di Forsa Arma den operacionnan contra e mafianan aki.

Pa e motibo ey, Ecuatorianonan tambe ta bay vota si nan kier reforma e Codigo Penal pa eleva e castigo di delitonan di terorismo y nan financiamento, reclutamento di muchanan cu fin delictivo, secuestro cu extorsion, narcotrafico, mineria ilegal, posesion ilegal di arma di candela, trafico di influencia, entre otro.

Mientras ta continua un estado di excepcion –prolonga 8 di maart ultimo pa 30 dia mas- cu obhetivo di combati e gruponan criminal, civilnan ta sigui muri. Siman pasa e alcalde mas hoben di e pais, Brigitte Garcia di 27 aña y su hefe di comunicacion a ser haya morto cu heridanan di bala, segun polis Ecuatoriano a informa.

Siman aki, varios homber arma a ataca un grupo di hende na ciudad di Guayaquil, a mata 9 persona y a laga herido otro 10, segun polis a indica. E mesun organismo ta afirma cu e grupo arma a ataca varios persona cu tabata practica deporte.

Mientras ta acumula e asesinatonan den aña aki, cifranan di 2023 ta devastador: hasta 7.994 persona a muri cu morto violento, segun polis. E mesun gobierno tambe ta sigura cu e number a aumenta den casi dos tercio compara cu aña anterior.

Mientras gobierno ta tira culpa riba e situacion creciente cu gruponan di traficante di cocaina, cu a destabilisa varios parti di Sur America, tambe ta apunta e deterioro economico post pandemia cu ta afecta tur e region.

Tambe por recorda cu na januari ultimo varios homber cu armanan di candela a drenta den un canal di television, un candidato presidencial a ser asesina ora e tabata saliendo for di un reunion durante eleccion di aña pasa, mientras cu centenares di preso a muri den enfrentamentonan den prison.