Ecuador a anuncia recorte di presupuesto, reduccion di salario di empleado publico y un debe, pa asina enfrenta e dificultadnan causa pa coronavirus y caida di prijs di petroleo.
“E enfermedad global di coronavirus ta generando un crisis economico na henter mundo y a golpia Ecuador fuertemente”, presidente Lenin Moreno a anuncia na radio y television.
E mandatario a agrega cu e pais, cu ta depende di benta di petroleo, ta perde pa dia alrededor di 8 miyon dollar pa caida di e prijs di petroleo.
Cu e situacion aki, cual el a señala como ‘basta delicado y dificil’, e mandatario a indica cu lo mantene un plan di austeridad cu a cuminsa na 2019.
Estado a spaar 448 miyon dollar aña pasa cu e retiro di trahadonan publico, loke ta supera 9.000 miyon dollar pa aña.
E empleadonan di estado cu ta sigui den funcion y ta cobra mas di 800 dollar pa luna lo haya un reduccion di salario di hasta 8%.
Moreno a agrega cu lo recorta na 1.400 miyon dollar e presupuesto estatal sin afecta e area di salud. P’esey lo elimina secretarianan, agencianan di control y empresanan publico.
E mandatario ta busca mas efectivo, motibo pa cual el ta gestiona cu dos organismo internacional, no identifica, un prestamo di 2.000 miyon dollar, como tambe un reprogramacion di vencemento di e debe externo, aunke no a duna mas detaye.
Moreno a anuncia e medidanan despues cu na october ultimo a fracasa e decision cu a acorda cu FMI di elimina 1.500 miyon dollar den subsidio pa combustibel. Despues e mandatario a cancela e decision pa via di protestanan social cu a laga un decena di persona fayecido.
