Minister Ecuatoriano di Interior, Maria Paula Romo, dialuna pasa a califica di ‘hopi grave’ e violacion posibel di datonan di miyones di Ecuatoriano a traves di un server na Miami, y a confirma cu ta realisando un investigacion pa conoce si ta existi algun daño.
Fin di siman pasa, vpnMentor a haya den un ‘cloud’ sin siguridad e nomber y datonan financiero y civil di 17 miyon di Ecuatoriano, incluyendo 6,7 miyon mucha. E violacion ta alcansa henter e poblacion practicamente, ya cu den censo ultimo cu a realisa na 2019 ta detaya cu tin 17.3 miyon habitante.
“E informacion cu nos a ricibi den oranan ultimo ta hopi grave”, e Minister a afirma den e prome reaccion di gobierno pa informacion riba e datonan personal y financiero di e Ecuatorianonan cu a keda exponi.
Den un conferencia di prensa, Romo a confirma cu gobierno Ecuatoriano a habri ‘desde prome oranan di mainta’ un investigacion pa ‘lanta tur informacion’ y ‘descubri kico a pasa y ken ta e responsabel di e filtracion aki’.
“Ami no lo gusta pa bay mas den e investigacion cu ta andando. Varios ekipo ta desaroya e investigacion na e momentonan aki y ademas ta purba di identifica kende lo ta e responsabel di e filtracion aki”, el a agrega.
E empresa Israeli di siguridad informatica, vpnMentor dialuna pasa a confirma na Israel, cu e filtracion ta contene informacion confidencial. E violacion a inclui un cantidad grandi di datonan sensibel riba situacion financiero, salarionan ricibi pa trabou y tambe relacionnan di famia di hopi ciudadano, loke lo por expone pa atake cibernetico, spionahe o hortamento di placa di parti di piratanan di informatica.
