Bintidos aña despues di e ultimo guera entre Peru y Ecuador, e tension entre e dos paisnan aki a bolbe, pa un conflicto na nan frontera. Dialuna ultimo gobierno di Peru a yama su embahador na Quito, Hugo Otero, pa un consulta. E yamada di gobierno di Peru na Otero, ta un protesta diplomatico en vista di e avance cu e construccion di un muraya fronteriso tin riba canal internacional di Zarumilla, cu ta separa e dos paisnan.
Municipio fronteriso di “Aguas Verdes (Perú) y Huaquillas (Ecuador)” ta casi mesun ciudad, tur dos ta separa pa un riu chikito so, cu hende por bula durante casi henter aña.
Pero awor gobierno di Ecuador a dicidi construi un muraya blanco di concreto, riba su banda di awa. Gobierno a dicidi di construi tambe un parke cu largura di un 1 kilometer y cu lo keda situa paralelamente pa 1529 meter na e limite internacional entre e paisnan.
Canciyeria di Peru a bisa dos luna pasa, cu e construccion di e muraya di banda di Ecuador a tuma luga sin tuma Peru na cuenta, sin consulta y cu ta viola tur acuerdo di paz, cu nan a firma na Brasilia na 1998 y cu a pone un fin na e conflicto arma.
Canciyeria di Peru a publica den un comunicado cu su decision a bin, pa motibo cu gobierno di Ecuador a construi un muraya como parti di e parke lineal, riba banda drechi di e canal internacional di Zaruimilla, y nan no a tuma den consideracion e solicitud cu Peru a haci pa un posibel paralisacion di e obra aki.
