(AP) — E cantidad di stoel bashi den segundo mita a refleha e decepcion di team Qatar pa apertura di su prome Mundial.
E anochi a cuminsa cu mas di 67mil fanatico, principalmente Qatari, yenando e Stadion Al Bayt, disfrutando e ceremonia di apertura cu a exhibi e emirato Arabe miniatura na un audiencia global 12 aña despues di gana e derecho di anfitrion pa e evento mas grandi di futbol mundial.
E anochi a termina cu e team Qatari abruma bandonando e cancha, su posicion no-desea den historia di futbol sigura y cu cantidad di fanatico decepciona desaparecido.
E torneo marca pa controversia a habri ayera, cu e campeon di Cup Asiatico 2019 derota 2-0 pa Ecuador, sigurando cu e team anfitrion a perde su wega di apertura pa prome biaha den un Mundial.
Coach di Qatar, Felix Sanchez a bisa: “Mi ta spera den proximo wega [e fanaticonan] por ta mas orguyoso.”
Capitan di Ecuador, Enner Valencia a anota ambos gol pa su team den e prome mita di un wega cu a termina siendo un ehercicio den con pa limita daño pa Qatar, riba un di e anochinan mas importante den historia di e nacion.
E partido a tuma lugar despues di 30 minuut di un ceremonia di apertura colorido – lidera pa actor ganador di Oscar, Morgan Freeman, y atendi pa dignatarionan poderoso incluyendo prins Saudi, Mohammed bin Salman – cu a promove inclusividad y humanidad bibando hunto “bao di un tent”.
Den loke por keda como un di e pio prestacion di un pais anfitrion durante apertura di un torneo, Qatar tabatin cinco tiro den e partido y niun a dal e obhetivo. E team tabatin apenas dos pase den area di penalty di oposicion. Simplemente, Ecuador tabata demasiado bon pa un team cu solamente tabata den Mundial pasobra e ta e anfitrion.
