E Presidente di Ecuador, Lenin Moreno, a instala bek su gobierno na Quito despues cu el a traslada temporalmente pa e ciudad di Guayaquil, durante e protestanan cu a sacudi e capital y cu tabata exigi e eliminacion di e decreto 883 cu tabata kita e subsidio pa combustibel.
E mandatario a aparece na e balcon di e Palacio di Carondelet, sede di Gobierno Ecuatoriano, hunto cu un multitud di persona cu tabata yena e Plasa di Independencia, e mesun cu durante e protestanan tabata protegi pa impedi e paso di manifestantenan pa e edificio presidencial.
Moreno a ordena e movecion den e cupula militar despues di e denuncia di e manifestantenan di excesivo represion durante e protesta.
Minister di Defensa, den un comunicado, a informa cu e presidente a nombra e General di Division Luis Lara Jaramillo como Hefe di Comando Conhunto di Forzanan Arma, na reemplaso di Roque Apolinar Moreira, y e General di Brigada Luis Altamirano Junqueira como Comandante General di Ehercito, kende lo reemplasa Javier Pérez.
Luis Lara Jaramillo ta un oficial di Fuerzas Especiales cu ta conta cu mas di 36 aña di servicio na su curriculum. E cambio oficialisa pa e Presidente a traves di e decreto 895, a hala atencion na e pais pa motibo cu Lara Jaramillo a demanda e ex-mandatario Rafael Correa ora e tabata presidente y e Presidente di Asamblea Nacional Gabriela Rivadeneira na Corte Constitucional.
Di su parti, Maria Paula Romo, minister di Gobierno, a informa cu durante e protestanan 115 auto y 26 unidad di polis comunitario a keda destrui y 430 sirbido policial a resulta herida.
