E gobierno di Lenin Moreno a confirma diaranson pasa a traves di e minister di Interior di Ecuador, Maria Paula Romo, cu e ex-minister di Turismo di Rafael Correa (2007-2017) Fernando Alvarado ,ta profugo di e husticia y ta na Venezuela.
Alvarado, kende tambe tabatin e cargo como secretario di comunicacion den e administracion ey, ta investiga pa supuesto mal uzo di placa publico y ta refugia na Venezuela, segun version no oficial na e cual e minister tabatin acceso.
“Ta informacion cu nos a confirma a traves di medionan informal. Manera boso sa, nos no tin relacion diplomatico cu e pais ey, locual ta dificulta pa nos haci e gestion cu e husticia ta rekeri pa pone orden di e huesnan” Romo a afirma den declaracion pa periodistanan.
Dentro di e investigacion pa e supuesto mal uzo di placa publico, e husticia a ordena prome dianan di augustus pasa varios medida di cautela pa Alvarado, entre nan, e uzo di un dispositivo electronico, e presentacion cada 15 dia dilanti di autoridadnan competente, y e prohibicion di salida for di e pais.
Na october di aña pasa, e autoridadnan Ecuatoriano a confirma cu e ex-funcionario a huy for di e pais, despues cu polis a haya e dispositivo electronico cu e tabatin na un riu riba caminda pa Quito.
Ecuador den e tempo ey, tabata verifica e posibilidad cu Alvarado a huy pa Venezuela den un avion di migrantenan Venezolano cu a bolbe pa su pais.
E ex-minister a denuncia den un video cu e tabata victima di ‘persecucion politico’, y el a huy pa motibo cu no tabatin posibilidad pa defende su mes den un huicio husto.
