(AFP) – Autoridadnan di Ecuador diasabra ultimo a confirma e morto di un detenido cu tabata relaciona cu e asesinato di ex-candidato presidencial Fernando Villavicencio, e number shete cu a muri for di diabierna.
Ministerio Publico a informa riba su rednan social cu a dispone e “lantamento di un cadaver di un persona priva di libertad na prizon El Inca, un centro penitenciario di Quito.
Autoridad carcelario den un comunicado a informa cu e detenido, igual cu e otro seis victima mortal registra e dia anterior den un prizon na ciudad di Guayaquil, tin “vinculo” cu homicidio di Villavicencio.
Diabierna di siman pasa, seis Colombiano deteni pa crimen aki a ser asesina memey di “disturbionan” na prizon di Guayas 1 di Guayaquil, un scenario frecuente di enfrentamentonan entre gruponan narcotraficante.
Presidente Guillermo Lasso a reuni cu Comite di Siguridad, despues a anuncia “e reorganisacion” di Polis na tempo cu a kita di su funcion e comandante general, Fausto Salinas, e director di investigacion y director di autoridad cancelario tambe.
Salinas ta bay ta reemplasa pa Cesar Zapata, segun Lasso a ordena den un decreto ehecutivo.
Asina mes, presidencia a anuncia cu ta bay haci un denuncia penal contra director di e prizon di Guayaquil, na unda e seis persona a ser asesina diabierna ultimo, “el a ser deteni pa duna su version na Fiscalia.”
“Ni complicidad ni encubrimento, e berdad ta bay prevalece,” e gobernante ken tin un guera habri contra narcotrafico a bisa diabierna ultimo.
E shete persona cu awendia ta morto, a ser captura despues di e asesinato di Villavicencio dia 9 di augustus, e ex-candidato presidencial a ser asesina cu tironan despues di un acto di su campaña na nort di Quito den marco di eleccionnan general pa 20 di augustus.
