(DW) – Un derame di petroleo no cuantifica a contamina e riu Napo, un di e riunan di Amazonas, cual ta afecta poblacionnan di Ecuador, segun e compania estatal Petroecuador a informa.

Sin bisa precies ki dia e incidente a pasa, e entidad a señala cu na e bloki 16, ubica na provincia Amazonico Orellana, un tuberia a kibra y a causa e leakmento di e crudo. Dia 26 di juni ultimo, “a presenta un fuerte awasero den e zona, loke a ocasiona cu un parti di hidrocarburo di e bareranan a sali pa e riu Napo,” a agrega.

E compania a indica cu “na e momentonan aki ta colocando bareranan adicional, cu e fin di evita e avance di e hidrocarburo y minimalisa e impacto, debi na awaseronan,” tambe a agrega cu “a mantene comunicacion directo cu e comunidadnan afecta,” sin duna mas detaye.

Ministerio di Ambiente a anuncia cu a traves di su personal tecnico, nan ta supervisa e avance di e procesonan di contene, limpia y recupera e crudo.

Petroecuador a señala cu despues di e derame, a instala bareranan preventivo como parti di e accionnan pa logra controla e situacion, pero cu awaseronan a causa dañonan na e riu importante aki di gran Amazonas cu ta crusa Brazil Peru y Colombia.

“Un desaster ambiental nobo na riu Napo,” e abogado Amazonico, defensor di derechonan humano y representante di personanan afecta pa actividad petrolero, Pablo Fajardo, a publica riba “X” afirmando cu “poblacion di e comunidadnan di e parokia Pañacocha na Sucumbios a denuncia esey.” E activista a publica un video cu ta mustra e coriente di awa cu manchanan di azeta, “aworaki no por ni pesca,” un persona ta bisa.

Ecuador ta saca crudo di e selva Amazonico, e cual ocasionalmente ta registra leakmento. Na februari 2022, un tuberia a kibra y a ocasiona e derame di 6,300 bari na e Parke Nacional protegi Cayambe-Coca, e cual tin un cantidad grandi di fauna y reserva di awa.

E biaha ey a resulta afecta e riunan Quijos y Coca. E ultimo tabata scenario na 2020 di otro derame, ora 15,000 bari a cay den awanan.

Petroleo ta e producto principal tradicional di exportacion di e pais, cu na 2023 a saca 475,000 bari pa dia di e cual a bende 66%. Entre januari y april 2024 a saca 485,000 bari y a bende 73% na exterior.