(Vistazo.com/TwitterBomberosdeQuito) – No menos di cinco persona a fayece y mas di trinta a keda herida despues cu un bus di servicio publico di e zona di Conocoto, na entrada di un valle cerca di Quito a accidenta, segun e bomberonan di e capital a informa diabierna pasa.
Di forma preliminar, a detaya cu tin seis pashent den ‘estado critico’ y 25 pashent ta ambulatorio; nan tabatin herida cu poli-traumatismo, corta y golpi na nivel general di nan curpa, y nan a keda stabilisa pa personal paramedico y a ser traslada pa diferente clinica di salud. E bus di transporte entre municipio, di e Cooperativa Los Chillos, tabata pasando na Los Valles, Quito, ora e bus a bolter riba caretera na altura di e sector Conocoto, cu aproximadamente 50 pasahero. Te ainda e causa di e suceso ta desconoci.
Na e luga di accidente, cuerpo di bombero di Quito a mobilisa 45 efectivo cu 3 vehiculo di rescate, 2 contra candela, 5 ambulance y ademas cu e colaboracion di ambulancenan di Cruz Cora y ministerio di Salud Publico.
E accidentenan di trafico na Ecuador a laga mas di 3.500 morto e aña aki. Esun di mas grave na 2018 a sucede na luna di augustus pasa, riba e caretera cu ta uni Quito cu e localidad di Papallacta, unda tabatin 23 fayecido y 22 persona a keda herida. Segun estadisticonan di Agencia Nacional di Transito, entre 2016 y 2017 a sucede 56.560 accidente, pa casi 80% debi na imprudencia, di incapacidad pa conduci of pa no mira e señalnan di trafico di parti di conductor y peaton.
